ប៉ូលិសទីក្រុង ក្លេវឺឡែន (Cleveland) រដ្ឋ អូហាយ៉ូ (Ohio) សហរដ្ឋអាមេរិក បានអំពាវនាវដល់បុរសម្នាក់ឲ្យប្រគល់ខ្លួនដល់អាជ្ញាធរ ក្រោយពីបុរសនោះបានបង្ហោះវីដេអូតាមបណ្ដាញសង្គម Facebook ដោយបង្ហាញពីឃាតកម្មទៅលើបុរសចំណាស់ម្នាក់ ។ ទោះយ៉ាងណា វីដេអូនោះ ត្រូវបានក្រុមហ៊ុន Facebook លុបចោលមិនឲ្យផ្សព្វផ្សាយតទៅទៀតឡើយ ។
មន្ត្រីរដ្ឋ អូហាយ៉ូ កំពុងស្វែងរកបុរសឈ្មោះ ស្ទីវ ស្ទេវឹន (Steve Stephens) ដែលបានធ្វើអំពើឃាតកម្ម ប៉ុន្តែមិនបានរកឃើញភស្តុតាងដែលបុរសនោះបានអះអាងក្នុងវីដេអូនោះថា ខ្លួនបានសម្លាប់មនុស្សជាង ១០ នាក់ផ្សេងទៀត ។ ប៉ូលិសទីក្រុង ក្លេវឺឡែន និយាយថា កម្លាំងសន្តិសុខកំពុងស្វែងរកឈ្មោះ ស្ទីវ ស្ទេវឹន ហើយអាជ្ញាធរចង់ឲ្យករណីនេះបញ្ចប់ដោយសន្តិវិធី ។ ប៉ូលិសរកឃើញថា ស្ទេវឹន ប្រើប្រាស់រថយន្ត Ford Fusion និងមានអាវុធជាប់ខ្លួន ។
ស្ទីវ ស្ទេវឹន បានបាញ់សម្លាប់បុរសអាយុ ៧៤ ឆ្នាំ ឈ្មោះ រ៉ូប៊ឺត ហ្គតវីន (Robert Godwin) ក្នុងរដ្ឋ អូហាយ៉ូ ពេលដែលជនរងគ្រោះកំពុងដើរទៅផ្ទះចេញពីកន្លែងបរិភោគអាហារថ្ងៃត្រង់កាលពីល្ងាចថ្ងៃអាទិត្យ ។ ក្រុមហ៊ុន Facebook បានពិនិត្យឡើងវិញនូវដំណើរការបណ្ដាញសង្គមរបស់ខ្លួន ក្រោយមានការរិះគន់យ៉ាងខ្លាំង ដោយសារវីដេអូដែលបង្ហាញភាពឃោរឃៅនោះ ស្ថិតនៅលើបណ្ដាញ Facebook ជាច្រើនម៉ោង ។
ប្រភពៈ reuters
