ខេត្តត្បូងឃ្មុំ ៖ ប្រជាកសិករនៅស្រុកមេមត់ ខេត្តត្បូងឃ្មុំ ដែលនិយមដាំដំណាំម្រេច ច្រើនជាងដាំដំណាំផ្សេងៗ ពូជម្រេច៣ប្រភេទ ដែលកសិករជ្រើសរើសយកមកដាំ ដោយសារវាអោយផលល្អ ហើយធន់និងអាកាសធាតុ។ ឆ្នាំនេះការប្រមូលផលរបស់បានផលល្អ ជាងឆ្នាំមុន ហើយតម្លៃក៏ថោកជាងឆ្នាំមុនដែរ។
ប្រជាជនដែលរស់នៅក្នុងខេត្តត្បូងឃ្មុំ ដែលមានបទពិសោធន៍ ក្នុងការដាំដុះម្រេច រយៈពេលជាច្រើនឆ្នាំមកហើយ បានបញ្ជាក់អោយដឹងថា៖ ជាទូទៅប្រជាកសិករ រស់នៅក្នុងខេត្តត្បូងឃ្មុំ និយមដាំពូជម្រេច ចំនួន៣ប្រភេទ រួមមាន-ពូជម្រេចខ្មែរ ហៅថាម្រេចបាយ ម្រេចជូរលិន និង ពូជម្រេច ឥណ្ឌា។ ពូជម្រេចទាំង៣ប្រភេទនេះ គឺវាបានផលប្រហាក់ប្រហែលគ្នា ហើយវាអាស្រ័យទៅលើការថែទាំ របស់កសិករ បើការថែទាំដិតដល់ម្រេចបានផល ពី៥ទៅ៦តោន ក្នុងមួយហិចតា។
ការដាំដុះក្នុងរយៈពេល១ឆ្នាំ ម្រេចចាប់អោយផលហើយ វាពេញលេញ នៅពេលវាមានអាយុចាប់ពី៣ទៅ៤ឆ្នាំ ការថែទាំកសិករត្រូវស្រោចទឹក រាល់៣ថ្ងៃម្តង គឺស្រោចទឹកអោយសើមជោគដី ហើយការប្រើប្រាស់ជីរ កសិករប្រើជីអ៊ីអ៊ឹម និងជីអាច់គោ ជីទាំង២មុកនេះ ធ្វើអោយដំណាំម្រេច របស់ពួកគាត់ បានផលច្រើនហើយល្អ។
ការទុកស្មៅនៅក្នុងចំការល្អម្យ៉ាងដែរនៅរដូវប្រាំង វាជួយអោយដីចំការមានជាតិសើមពេលយប់វាជួយបឺតទឹកសន្សើមថែមទៀតផង ពួកគាត់ប្រមូលផលដំណាំម្រេចចាប់ពី២ខែទៅ៦ទើបបេះផ្លែវាអស់ ឆ្នាំនេះម្រេចអោយផលល្អច្រើនដោយសាអាកាសធាតុល្អមានការធ្លាក់ភ្លៀងជារហូរហែ តែតម្លៃក្នុងទីផ្សារ ក្នុង១គីឡូក្រាម តម្លៃ១៨០០០រៀល ចាញ់ឆ្នាំទៅតម្លៃ៤៦០០០រៀល។
សូមបញ្ជាក់ផងដែរថា ភាពប្រឈមុខរបស់ប្រជាកសិករ តម្លៃម្រេចចុះថោកប៉ុណេះ ផាត់ថ្លៃជីការថែទាំ កសិករចំណេញដែរ តែតិចតួចណាស់។ ម្រេចងាប់ មូលហេតុទី១ អាកាសធាតុក្តៅពេកទី២ភ្លៀងខ្លាំងពេក បណ្ដាលឲ្យជាំទឹកទី៣ ការប្រើប្រាស់ជីខុសបច្ចេកទេស។ ខេត្តត្បូងឃ្មុំរបស់យើង ប្រជាកសិករ បានដាំដំណាំម្រេច ទាំង៧ស្រុក,ក្រុង ហើយក្នុងនោះមានស្រុកមេមត់ បានដាំម្រេចច្រើនជាងគេ គឺរហូតដល់ចំនួន២១០០ហិតាឯណោះ។
ពាក់ព័ន្ធបញ្ហានេះ ប្រជាកសិករដាំដំណាំម្រេច បាននាំគ្នាសំណូមពរឲ្យប្រមុខរដ្ឋាភិបាល ជួយរកតម្លៃទីផ្សារ ឲ្យបានសមរម្យ សម្រាប់ពួកគាត់ផង៕ ដោយ ឆវ័ន្ន
