រដ្ឋាភិបាលប្រទេសអុីរ៉ង់ ថ្មីៗនេះបានធ្វើការរិះគន់យ៉ាងខ្លាំង និងបានថ្កោលទោសយ៉ាងពេញទំហឹង ចំពោះការដាក់ទណ្ឌកម្មរបស់សហរដ្ឋអាមេរិក មកលើកម្មវិធីអភិវឌ្ឍន៍នុយក្លេអ៊ែររបស់ខ្លួន។ ក្រុងតេហេរ៉ង់លើកឡើងថា សកម្មភាពប្រឆាំងរបស់ប្រទេសមហាអំណាចមួយនេះនឹងបង្កឲ្យប៉ះពាល់ដល់កិច្ចព្រមព្រៀងនុយក្លេអ៊ែរ។ នេះបើយោងតាមការសេចក្ដីថ្លែងការណ៍មួយរបស់រដ្ឋាភិបាលអុីរ៉ង់នៅថ្ងៃព្រហស្បតិ៍ ទី១៨ ខែឧសភា ឆ្នាំ២០១៧។
តាមការអះអាងរបស់អ្នកនាំពាក្យក្រសួងការបរទេសអុីរ៉ង់ លោក Bahram Ghasemi “ទីក្រុងតេហេរ៉ង់ សូមធ្វើការថ្កោលទោសយ៉ាងពេញទំហឹង ទៅលើចេតនាអាក្រក់របស់រដ្ឋាភិបាលទីក្រុង វ៉ាស៊ីនតោន ដែលបានដាក់ទណ្ឌកម្មបន្ថែមលើការកម្មវិធីអភិវឌ្ឍន៍មីស៊ីល ខណៈអុីរ៉ង់ប្ដេជ្ញាគោរពតាមកិច្ចព្រមព្រៀងនុយក្លេអ៊ែរ (JCPOA)។ ទង្វើនេះបញ្ជាក់ថា អាមេរិកកំពុងធ្វើឲ្យប៉ះពាល់ដល់កិច្ចព្រមព្រៀង"។
សូមបញ្ជាក់ថា ការថ្កោលទោសរបស់រដ្ឋាភិបាលអុីរ៉ង់ គឺជាការរើបម្រះចេញពីការដាក់ទណ្ឌកម្មថ្មីមួយទៀត ដែលប្រធានាធិបតីអាមេរិក លោក ដូណាល់ ត្រាំ ទើបបានចេញវិធានការដាក់ពិន័យដល់ក្រុមហ៊ុនមួយរបស់ចិន និងក្រុមហ៊ុនជាប់ពាក់ព័ន្ធទៅនឹងកម្មវិធីនុយក្លេអ៊ែរដទៃទៀត ក្នុងទីក្រុងតេហេរ៉ង់។ រដ្ឋាភិបាលអាមេរិកចាត់ទុកថា ការអភិវឌ្ឍន៍មីស៊ីល នៅក្នុងប្រទេសមួយនេះ គឺជាការបំពានច្បាប់អន្តរជាតិ៕
