រាជធានីភ្នំពេញ៖ ពលរដ្ឋខ្មែរជិត២០នាក់ត្រូវបានអាជ្ញាធរថៃចាប់ឃាត់ខ្លួន បន្ទាប់បានលួចឆ្លងដែនចូលទឹកដីប្រទេសថៃ ដើមកាប់ឈើក្រញូងដោយខុសច្បាប់នៅតំបន់អភិរក្សព្រៃឈើ ចំណុច WA ២៦២៩៣០ នៃស្រុក ឃុនហាន ខេត្តស៊ីសាកតរ កាលពីថ្ងៃទី១៣ ឧសភា និងនៅក្នុងឧទ្យានជាតិប៉ាងស៊ីដា ខេត្តសាកែវ កាលពីថ្ងៃទី១៤ ខែឧសភា ឆ្នាំ២០១៧។
យោងតាមលិខិតរបស់ក្រសួងការបរទេសកម្ពុជា ចុះថ្ងៃទី១៨ ខែឧសភា ឆ្នាំ២០១៧នេះបានឲ្យដឹងថា ពលរដ្ឋខ្មែរដែលអាជ្ញាធរថៃ ខេត្តសាកែវ ចាប់ឃាត់ខ្លួនពីបទ លួចឆ្លងដែនចូលកាប់ឈើដោយច្បាប់នោះ មានចំនួន១០នាក់ សុទ្ធតែជាបុរសនិងមកពីខេត្តបន្ទាយមានជ័យ។ ដោយឡែក ៩នាក់ទៀត ក្នុងនោះមានស្រី ៣ នាក់ ត្រូវបានអាជ្ញាធរខេត្តស៊ីសាកេត ចាប់ខ្លួនបាននៅតំបន់អភិរក្សព្រៃឈើ ចំណុច WA ២៦២៩៣០ ខណៈដែលពួកគេបានកំពុងកាប់ និងអូសឈើក្រញូង។
បច្ចុប្បន្នពលរដ្ឋខ្មែរទាំង១៩នាក់ខាងលើត្រូវបានអាជ្ញាធរថៃ ឃុំខ្លួនជាបណ្ដោះអាសន្ន ដោយ១០នាក់ត្រូវឃុំខ្លួនក្នុងពន្ធនាគារខេត្ត សាកែវ និង៩នាក់ទៀតនៅក្នុងពន្ធនាគារខេត្តស៊ីសាកេត ដើម្បីរង់ចាំកសាងសំណុំរឿងបញ្ជូនទៅតុលាការ។ ពាក់ព័ន្ធករណីនេះស្ថានអង្គកុងស៊ុលកម្ពុជាបានបញ្ជូនមន្ត្រីរបស់ខ្លួនទៅសួរសុខទុក្ខរួចហើយនិងក៏កំពុងតែជួយសម្របសម្រួលឲ្យមានការកាត់ក្តីឆាប់រហ័ស និងត្រៀមផ្តល់មេធាវីជូនពួកគេផងដែរ។
