កងទ័ព អាមេរិក បាញ់មីស៊ីលឆ្លងទ្វីបមួយគ្រាប់ចេញពីកោះ Marshall នៅកណ្ដាលមហាសមុទ្រប៉ាស៊ីហ្វិក រួចហើយបាញ់មីស៊ីលទប់ស្កាត់មួយគ្រាប់ផ្សេងទៀតដែលទើបអភិវឌ្ឍថ្មីចេញពីមូលដ្ឋានទ័ពអាកាសរដ្ឋ កាលីហ្វ័រញ៉ា ដើម្បីបំផ្លាញមីស៊ីលដែលហោះហើរសំដៅទៅរកទឹកដីអាមេរិក ។
មីស៊ីលចេញពីរដ្ឋកាលីហ្វ័រញ៉ា បានបំផ្លាញទាំងស្រុងនូវមីស៊ីលឆ្លងទ្វីបដែលបាញ់ចេញពីកោះ Marshall ធ្វើឲ្យមីស៊ីលនោះមិនអាចឆ្ងងកាត់មហាសមុទ្រប៉ាស៊ីហ្វិក ទៅដល់ទឹកដី អាមេរិក បានឡើយ ។ រដ្ឋាភិបាល សហរដ្ឋអាមេរិក ចាប់ផ្ដើមអភិវឌ្ឍប្រព័ន្ធអាវុធទប់ទល់មីស៊ីលឆ្លងទ្វីបតាំងពីឆ្នាំ ២០០២ មកម្លេះ ដោយចំណាយប្រាក់អស់ ៤០ពាន់លានដុល្លារ ។
ទីបំផុតរយៈពេល ១៣ ឆ្នាំកន្លងទៅនេះ ការប្រឹងប្រែងរបស់ភ្នាក់ងារការពារមីស៊ីលទទួលបានលទ្ធផលជោគជ័យ ១០០% នៅពេលដែលប្រព័ន្ធអាវុធរបស់ខ្លួនបំផ្លាញមីស៊ីលឆ្លងទ្វីប ដែលកំពុងហោះហើរសំដៅទៅរកទឹកដី អាមេរិក ធ្វើឲ្យអ្នកចូលរួមទស្សនាការសាកល្បងស្រែកហោរ អបអរយ៉ាងខ្លាំង ។
អ្វីដែលធ្វើឲ្យមន្ត្រី អាមេរិក សប្បាយចិត្តបំផុត គឺសមត្ថភាពរបស់ប្រព័ន្ធការពារនេះ អាចទប់ស្កាត់មីស៊ីល កូរ៉េខាងជើង ជាប្រទេសដែលកំពុងប្រឹងប្រែងអភិវឌ្ឍមីស៊ីលឆ្លងទ្វីប ហើយបានសាកល្បងមីស៊ីលរបស់ខ្លួនជាញឹកញាប់ ។