ភ្លៀងធ្លាក់ខ្លាំងឥតឈប់ឈរកម្រិត ១៥៦ សង់ទីម៉ែត្រ ចាប់តាំងពីថ្ងៃទី ២៤ បានជន់លិចតំបន់ចំនួន ២៣ របស់ទីក្រុង បាងកក ក្រោយពីភ្លៀងធ្លាក់ប៉ុន្តែនាយករដ្ឋមន្ត្រី បន្ទោសបញ្ហាទឹកជំនន់មួយផ្នែកដោយសារការរក្សាទុកសំរាមមិនត្រឹមត្រូវ និងជំរុញដល់ប្រជាជនឲ្យសហការជាមួយអាជ្ញាធរដើម្បីជៀសវាងបញ្ហាទឹកជំនន់ ។
នាយករដ្ឋមន្ត្រី ថៃ លោក ប្រាយុទ្ធ ចាន់អូចា បានបញ្ជាដល់មន្ត្រីទីក្រុង បាងកក ឲ្យស្វែងរកដំណោះស្រាយជាបន្ទាន់ក្រោយពីរាជធានីត្រូវបានជន់លិចដោយសារភ្លៀងធ្លាក់ខ្លាំងឥតឈប់ឈរបន្តបន្ទាប់គ្នាជាច្រើនថ្ងៃ ដោយលោក ប្រាយុទ្ធ ណែនាំឲ្យផ្ដោតទៅលើការបញ្ចៀសទឹកចេញពីសង្កាត់ទាបៗក្នុងទីក្រុង ដែលរងគ្រោះធ្ងន់ធ្ងរបំផុត ។
លោក ប្រាយុទ្ធ បានបញ្ជាឲ្យមន្ត្រីដោះស្រាយបញ្ហាសំរាមដែលជាមូលហេតុសំខាន់ ព្រោះវាធ្វើឲ្យរាំងស្ទះដល់ប្រព័ន្ធបង្ហូរទឹក ។ ចំណែកអាជ្ញាធរនឹងរាយការណ៍ដល់លោកនាយករដ្ឋមន្ត្រីអំពីលទ្ធផលនៃដំណើរការទប់ទល់ទឹកជំនន់ ។
