កាលពីថ្ងៃទី០១ ខែឧសភា ឆ្នាំ២០១៧ យុវជននៃអង្គការមាតាធម្មជាតិ បានចេញផ្សាយនូវវីដេអូរិះគន់មួយដល់មន្ត្រីនៃក្រសួងរ៉ែ និងថាមពលធ្ងន់ៗ ដោយចោទប្រកាន់ថាមន្ត្រីមានសមត្ថកិច្ចហាក់គ្មានសមត្ថភាពគ្រប់គ្រងការបូមខ្សាច់ខុសច្បាប់លក់ទៅក្រៅប្រទេស។
ពាក្យសំដីរិះគន់បែបធ្ងន់ៗរបស់កញ្ញា លីម គីមស័រ សកម្មជនរបស់អង្គការមាតាធម្មជាតិ ដែលបានចោទប្រកាន់ទៅមន្ត្រីពាក់ព័ន្ធនៃការបូមខ្សាច់យ៉ាងសំបើមនេះ បានធ្វើឲ្យលោក ឌិត ទីណា អ្នកនាំពាក្យនៃក្រសួងរ៉ែ និងថាមពលបានចេញមកបកស្រាយទាក់ទងនឹងការរិះគន់របស់សកម្មជនមាតាធម្មជាតិ កាលពីម្សិលមិញនេះផងដែរ ដោយលោកបានបរិយាយដូចតទៅនេះ ៖
«អរគុណប្អូនស្រី អរគុណយុវជន មាតាធម្មជាតិ សម្រាប់ការផ្សាយពីរឿងនេះ នៅក្នុងបណ្ដាញសង្គម ការផ្សាយរបស់ប្អូន គឺជាការចូលរួមដ៏ល្អមួយ តែបងពិតជាមាន ការសោកស្ដាយជាទីបំផុត សោកស្ដាយនៅត្រង់ថា ប្រសិនពេលប្អូនឃើញហេតុការណ៍នេះភ្លាម ប្អូនទាក់ទងមកក្រសួងភ្លាម ដើម្បីចូលរួមសហការ ម្ល៉េះសមតែអាចចាប់បាននៅនឹងកន្លែង រឺដឹងកាន់តែច្បាស់ថាខុសច្បាប់ឬក៏អត់?
មួយទៀតប្អូនត្រូវយល់ថា ខ្សាច់ដែលផ្អាកហាមនាំចេញ មានតែខ្សាច់លុប និងខ្សាច់សំណង់ទេ ចំណុចនេះហើយ ដែលពិបាកឆ្លើយថាអ្វីដែលប្អូនឃើញជាបទល្មើស ឬក៏អត់? ប្រសិនប្អូនមិនមែនជាមន្ត្រីជំនាញ ឬអ្នកបច្ចេកទេស ប្អូននៅតែអាចធ្វើការងារនេះ តាមការសហការមកក្រសួងដើម្បីទទួលបានព័ត៌មានច្បាស់ និងចាត់វិធានការបានទាន់ពេល។ ផ្ទុយទៅវិញប្អូនឃើញ តែមិនរាយការណ៍ ដោយថតជាវីដេអូ និងចំណាយពេលកាត់តបង្ហោះ ហើយសួរមិនផ្ទាល់មកកាន់រដ្ឋមន្ត្រីក្រសួង។
តើអ្វីដែលប្អូនធ្វើពិតជាក្នុងចេតនាចូលរួមការពារធនធានធម្មជាតិ ឬគ្រាន់តែក្នុងន័យជាន់ពន្លិច
ឃើញចោរមិនហៅប៉ូលិសចាប់ចោរ បែរជាថតចោរ ហើយស្រែកថាប៉ូលិសអត់សមត្ថភាព បើកដៃឲ្យចោរលួច»។
ទោះជាយ៉ាងសូមប្រិយមិត្តត្រិះរិះពិចារណាចំពោះការរិះគន់ និងការបកស្រាយដូចដែលមានស្រាប់ ដើម្បីចូលរួមចំណែកក្នុងការអភិវឌ្ឍន៍សង្គម និងប្រទេសឲ្យរីកចំរើនប្រកបដោយទំនួលខុសត្រូវ និងសន្តិវិធី៕