នេះបើតាមប្រសាសន៍របស់ឯកឧត្ដម ប៉ា សុជាតិវង្ស ក្នុងឱកាសចុះត្រួតពិនិត្យផលប៉ះពាល់លំនៅឋានប្រជាពលរដ្ឋរស់នៅតាម បណ្ដោយផ្លូវរថភ្លើង នៅខណ្ឌឫស្សីកែវ កាលពីព្រឹកថ្ងៃទី២៤ ខែឧសភា ដើម្បីកែលម្អស្ថានភាព នៃការរស់នៅតាមបណ្តាយ ផ្លូវរថភ្លើង និងប្រព័ន្ធហេដ្ឋារចនាសម្ព័ន្ធឱ្យបានល្អ។
ឯកឧត្តមបានបន្តថា ការពន្លឿនដោះស្រាយ ផលប៉ះពាល់ជូនបងប្អូន អាជ្ញាធររាជធានីនឹងខិតខំ ដោះស្រាយបញ្ហាបន្តិចម្ដងៗឱ្យបានចប់សព្វគ្រប់ និងមានកន្លែងរស់នៅបានសមរម្យដោយមិនចាំបាច់ រើចេញពីតំបន់ នេះឡើយ។
ឯកឧត្ដមក៏អះអាងពីគម្រោងនេះដែរថា "ខ្ញុំសូមបញ្ជាក់ថា គ្មានការបណ្ដេញបងប្អូនមួយគ្រួសារណាឡើយ ហើយយើងនឹងរៀបចំបងប្អូនឱ្យមានលំនៅដ្ឋានលើផ្លូវរថភ្លើងនេះទាំងអស់គ្នាតែម្តង សូមបងប្អូនទាំងអស់នឹងនក្នុងចិត្តនិងកុំជឿតាមការញុះញង់របស់ក្រុមមួយចំនួនដែលចង់ឱ្យតែសង្គមវឹកវរ និងបងប្អូនភិតភ័យ"។
យោងតាម AKP មន្ត្រីសាធារណការរាជធានីភ្នំពេញ ក៏បានឲ្យដឹងដែរថា គម្រោងផ្លូវបេតុង ជំនួសផ្លូវដែកនេះ មានទំហំទទឹងម្ខាង១៥ម៉ែត្រ ក្នុងនោះត្រូវសាងសង់តួផ្លូវ២២ម៉ែត្រ និងទុកចិញ្ចើមម្ខាង៤ម៉ែត្រ សម្រាប់ដាក់លូ និងប្រព័ន្ធទឹកស្អាតជាដើម។ ចំពោះប្រជាពលរដ្ឋដែលរងផលប៉ះពាល់ អាជ្ញាធរនឹងដោះស្រាយផលប៉ះពាល់បន្តិចម្ដងៗ ឱ្យបានចប់សព្វគ្រប់ជូនប្រជាពលរដ្ឋ។
ការអភិវឌ្ឍផ្លូវដែកឱ្យទៅជាផ្លូវបេតុងតាមបណ្ដោយផ្លូវរថភ្លើងនេះ មានប្រវែងជិត ៥គីឡូម៉ែត្រ ចាប់ពីផ្លូវលេខ៧០ទំនប់ទួលគោក ខណ្ឌទួលគោក ឆ្ពោះទៅ ផ្លូវជាតិលេខ ៥ ខណ្ឌឫស្សីកែវ ត្រង់ចំណុចរោងចក្ រSKD សង្កាត់គីឡូម៉ែត្រលេខ៦៕
