ទាហាន ហ្វីលីពីន បើកប្រតិបត្តិការប្រឆាំងក្រុមឥស្លាមជ្រុលនិយម មានឈ្មោះថា អ្នកប្រយុទ្ធដើម្បីសេរីភាពឥស្លាមបាងសាម៉ូរ៉ូ មានមូលដ្ឋាននៅលើកោះ មីនដាណាវ ភាគខាងត្បូង និងជាក្រុមដែលបានប្ដេជ្ញាចងសម្ពន្ធភាពជាមួយក្រុម ISIS នៅមជ្ឈិមបូព៌ា ។
ទាហាន ហ្វីលីពីន បញ្ជាក់ថា ក្នុងចំណោមសមាជិកជីវពលទាំងនោះមាន ៦ នាក់ គឺជាក្រុម ISIS មកពីប្រទេស ឥណ្ឌូណេស៊ី ដែលកំពុងហ្វឹកហ្វឺនជាមួយក្រុម បាងសាម៉ូរ៉ូ អំពីរបៀបផលិតគ្រាប់បែក ប៉ុន្តែពួកគេស្ថិតក្រោមការឡោមព័ទ្ធរបស់ទាហានរដ្ឋាភិបាល និងការវាយប្រហារតាមអាកាស ។ ក្រុម បាងសាម៉ូរ៉ូ គឺជាក្រុមឧទ្ទាមបំបែកចេញពីក្រុមមូស្លីមជ្រុលនិយមធំមួយឈ្មោះ រណសិរ្សរំដោះឥស្លាមម៉ូរ៉ូ ដោយសារក្រុមនេះ បង្កើតកិច្ចព្រមព្រៀងសន្តិភាពជាមួយរដ្ឋាភិបាល ។
ភ្នាក់ងារស៊ើបអង្កេត ហ្វីលីពីន រាយការណ៍ថា សមាជិកក្រុម បាងសាម៉ូរូ ៣១ នាក់ត្រូវបានសម្លាប់ ក្នុងនោះមានមេដឹកនាំក្រុមនេះម្នាក់ ដែលគេស្គាល់ថា ប៊ុងហ្គោស រួមជាមួយនឹងជំនួយការពីរនាក់ទៀត ។ អ្នកភូមិជាងពីរម៉ឺននាក់ ត្រូវជ្រកកោននៅតាមសាលារៀន និងទីជម្រកបណ្ដោះអាសន្នផ្សេងៗ បន្ទាប់ពីប្រតិបត្តិការនោះចាប់ផ្ដើមកាលពីដើមខែ ឧសភា ។
