រាជធានីភ្នំពេញ៖ ក្រោយពីមានការព្រួយបារម្ភពីសមាគមអ្នកចិញ្ចឹមជ្រូកនៅកម្ពុជានិងបានស្នើសុំឲ្យរដ្ឋាភិបាលបញ្ឈប់ការនាំចូលសត្វជ្រូកពីប្រទេសជិតខាងនោះ រដ្ឋមន្ត្រីក្រសួងកសិកម្ម បានលើកឡើងថា កម្ពុជាមិនអាចហាមឃាត់មិនមានការនាំចូលរួមសត្វជ្រូករស់ពីប្រទេសជិតខាងដាច់ខាតនោះទេ ប៉ុន្តែកម្ពុជាអាចកំណត់ចំនួនការនាំចូលសត្វជ្រូកឲ្យបានច្បាស់លាស់បាន។
នេះបើតាមប្រសាសន៍របស់ ឯកឧត្ដមរដ្ឋមន្ត្រី វេង សាខុន បានថ្លែងក្នុងកិច្ចពិភាក្សាជាមួយតំណាងសមាគមអ្នកចិញ្ចឹមជ្រូកនៅកម្ពុជា ជាលើកដំបូង នៅព្រឹកថ្ងៃទី១៦ ខែឧសភា ឆ្នាំ២០១៧ នៅទីស្តីការក្រសួង ដែលមានឯកឧត្ដម និងលោកឧកញ៉ា ម៉ុង ឬទ្ធី ធ្វើជាសហប្រធានក្រុមការងារ កសិកម្ម កសិឧស្សាហកម្ម បន្ទាប់ពីមានសំណើរបស់ពួកគេបានស្នើឡើង នៅសាលប្រជុំអគ្គនាយកដ្ឋាន សភាពាណិជ្ជកម្មកម្ពុជា កាលពីថ្ងៃទី២៧ ខែមេសា ឆ្នាំ២០១៧។
ឯកឧត្តមរដ្ឋមន្ត្រី បានបន្ថែមថា ដើម្បីជាដំណោះស្រាយ ដល់អ្នកចិញ្ចឹមជ្រូកក្នុងស្រុក ក្រសួងកសិកម្ម សម្រេចឲ្យក្រុមហ៊ុននាំជ្រូកចូលអនុវត្តតាមច្បាប់ឡើងវិញ ដោយនាំចូលតែ ១២៥០ក្បាលប៉ុណ្ណោះក្នុងមួយថ្ងៃ ហើយប្រសិនជាក្រុមហ៊ុនបំពាន នោះក្រសួងនឹងចាត់វិធានតាមផ្លូវច្បាប់។
សូមបញ្ជាក់ផងដែរថា តម្រូវការជ្រូកសម្រាប់ផ្គត់ផ្គង់នៅប្រទេសកម្ពុជា មានចំនួន ៨ពាន់ក្បាល ក្នុងមួយថ្ងៃ ខណៈកម្ពុជាអាចចិញ្ចឹមជ្រូកនិងផ្គត់ផ្គង់ខ្លួនឯង បាន ៧ពាន់ក្បាល ប៉ុន្តែការនាំចូលសត្វជ្រូកពីប្រទេសជិតខាង មានរហូតដល់ចន្លោះ ពី ៣ពាន់ទៅ ៤ពានក្បាល ដូច្នេះវាកក្តាដែលធ្វើឲ្យសមាគមអ្នកចិញ្ចឹមជ្រូកនៅកម្ពុជា ក៏ដូចជា កសិករក្នុងស្រុក មានការព្រួយបារម្ភខ្លាំងនិងប្រឈមនឹងហានិភ័យ តម្លៃជ្រូកធ្លាក់ចុះ ដែលមិនអាចទូទាត់ថ្លៃដើមបាន។
