ពលរដ្ឋកូរ៉េខាងជើងចំនួន ៦នាក់ ដែលឃុំខ្លួននៅក្នុងទីក្រុងសេអ៊ូលនាពេលកន្លងមក ថ្ងៃអង្គារ ទី៣០ ខែឧសភានេះ ពួកគេត្រូវបានរដ្ឋាភិបាលអនុញ្ញាតឲ្យត្រឡប់ទៅកាន់ស្រុកទេសវិញ។ នេះបើយោងតាមការចេញផ្សាយរបស់ទីភ្នាក់ងារសារព័ត៌មាន Yonhap។
ពលរដ្ឋនេសាទកូរ៉េខាងជើងចំនួន ៦នាក់ ដែលមានទូក ២គ្រឿង ត្រូវបានរដ្ឋាភិបាលកូរ៉េខាងត្បូងសម្រេចបញ្ជូនឲ្យត្រឡប់ទៅកាន់ស្រុកទេសវិញ បន្ទាប់ពីឆ្មាំសមុទ្រស្ទាក់ចាប់ខ្លួន និងបានជួយសង្គ្រោះដោយទ័ពជើងទឹករបស់កូរ៉េខាងត្បូង នៅដែនសមុទ្រខាងកើត កាលពីថ្ងៃទី២៧ ខែឧសភា សប្ដាហ៍មុន។
យោងតាមសេចក្ដីថ្លែងការណ៍ពីក្រសួងបង្រួបបង្រួមជាតិកូរ៉េខាងត្បូង បានលើកឡើងថា "អ្នកទាំង៦នាក់នោះ បានបញ្ជូនទៅផ្ទះវិញហើយ គឺពួកគេវិលត្រឡប់ទៅដោយមានសុវត្ថិភាព..."។ ទន្ទឹមគ្នានេះដែរ ក្នុងសេចក្ដីថ្លែងការណ៍ថា ពលរដ្ឋកូរ៉េខាងជើងទាំង ៦នាក់ខាងលើ នឹងចេញដំណើរតាមនាវានៅម៉ោង ៩:០០ ព្រឹកថ្ងៃពុធ ស្អែកនេះ៕
