បើយោងតាមការចុះផ្សាយរបស់គេហទំព័រសារព័ត៌មាន រុស្ស៊ី(RT) នាព្រឹកថ្ងៃទី៣០ ខែឧសភា ឆ្នាំ២០១៧ថា មានខ្យល់ព្យុះកំណាច (Dozen) បានបោកបក់ទៅលើទីក្រុងមូស្គូ ប្រទេសរុស្ស៊ី ដែលបណ្ដាលឲ្យមានមនុស្សស្លាប់ និងរងរបួសជាច្រើនរយនាក់ នៅក្នុងហេតុការណ៍នេះ។
មជ្ឈមណ្ឌលគ្រប់គ្រងគ្រោះមហន្តរាយរុស្ស៊ី បានរាយការណ៍ថា ក្នុងហេតុការណ៍ខាងលើបានសម្លាប់អាយុជីវិតមនុស្សសរុប១២នាក់ និង១២៥នាក់រងរបួសយ៉ាងធ្ងន់បូករួមទាំងកុមារ១៧នាក់ផ្សេងទៀតដែលគ្រោះថ្នាក់ផងដែរ។ ប្រលានយន្តហោះអន្តរជាតិទីក្រុងម៉ូស្គូ ឈ្មោះ Domodedovo និង Sheremetyevo ត្រូវបានលុបចោលជើងហោះហើរមួយចំនួន និងពន្យារពេលហោះហើររបស់អតិថិជនចំនួន ៣៣នាក់ ដោយសារតែអាកាសធាតុអាក្រក់នេះ។
គួរបញ្ជាក់ផងដែរថា មជ្ឈមណ្ឌលគ្រប់គ្រងខាងលើ បានចេញសេចក្ដីប្រកាសថា ព្យុះកំណាចនេះមានកម្លាំងខ្យល់ពី ១៧-២២ម៉ែត្រក្នុងមួយវិនាទី អាចបំផ្លិចបំផ្លាញអគារ ផ្ទះសំបែង ដើមឈើ និងចរន្តអគ្គិសនីនានាជាច្រើនកន្លែងក្នុងទីក្រុងបានដោយងាយស្រួល៕