យោងតាមប្រព័ន្ធផ្សព្វផ្សាយជប៉ុន បានប្រាប់ឲ្យដឹងថា សមាជិកគ្រួសារព្រះចៅអធិរាជជប៉ុន ព្រះនាងម្ចាស់ Mako សុខចិត្តលះបោះបង់ខ្សែរាជវង្ស ដើម្បីរៀបការជាកូនកំលោះជាជនសាមញ្ញម្នាក់ ដែលព្រះនាងបានស្គាល់គ្នា រយៈពេល០៥ឆ្នាំមកហើយ។ នេះបើយោងតាមគេហទំព័រសារព័ត៌មាន BBC នៅថ្ងៃទី១៨ ខែឧសភា ឆ្នាំ២០១៧។
ប្រព័ន្ធផ្សព្វផ្សាយខាងលើ បានបន្ថែមទៀតថា ព្រះនាងម្ចាស់ Mako មានព្រះជន្ម ២៥វស្សា និងជាចៅស្រីច្បង របស់ព្រះចៅអធិរាជជប៉ុន Akihito នឹងភ្ជាប់ពាក្យជាមួយបុគ្គលិកក្រុមហ៊ុនច្បាប់ម្នាក់ឈ្មោះ Kei Komuro អាយុ២៥ឆ្នាំ ដែលព្រះនាងរៀនជាមួយក្នុងសកលវិទ្យាល័យ International Christian University ក្នុងទីក្រុងតូក្យូ កាលពីឆ្នាំ២០១២មកម្ល៉េះ។
ទាក់ទិនបញ្ហាខាងលើនេះ ខាងរាជវាំងជប៉ុនពុំទាន់ធ្វើការអត្ថាធិប្បាយនៅឡើយទេ ខណៈពេលដែលសួររឿងពាក់ព័ន្ធនឹងគម្រោងភ្ជាប់ពាក្យរបស់ពួកគេទាំងពីរ។ កាលពីថ្ងៃពុធកន្លងទៅនេះ លោក Kei Komuro បាននិយាយថា "នេះមិនមែនជាពេលវេលា សម្រាប់ខ្ញុំធ្វើការអត្ថាធិប្បាយនោះទេ ប៉ុន្តែខ្ញុំនឹងបកស្រាយរឿងនេះ នៅពេលសាកសមណាមួយ"។
គួររំលឹកផងដែរថា ច្បាប់របស់អធិរាជប្រទេសជប៉ុន បានចែងថា ប្រសិនសមាជិកក្នុងគ្រួសាររាជវង្ស រៀបការជាមួយមនុស្សធម្មតានឹងត្រូវក្លាយរាស្ត្រសាមញ្ញជារៀងរហូត ៕
