ប្រាសាទអង្គរវត្តរបស់កម្ពុជា បានជាប់ថ្នាក់លេខ១ ជាសំណង់ដ៏មានសារៈសំខាន់ផ្នែកប្រវត្តិសាស្ត្រអស្ចារ្យបំផុតរបស់ពិភពលោកសម្រាប់ ឆ្នាំ២០១៧នេះ បន្ទាប់ពីមានការចូលរួមបោះឆ្នោតពីភ្ញៀវទេសចររាប់លាននាក់ជុំវិញពិភពលោក គេហទំព័រដ៏ល្បីល្បាញ TripAdvisor។ នេះបើយោងតាមការឲ្យពីហ្វេសប៊ុកអាជ្ញាធរជាតិអប្សរាកាលពីម្សិលមិញ។
ប្រភពហ្វេសប៊ុកអាជ្ញាធរជាតិអប្សរាដដែលបានបញ្ជាក់ថា នេះគឺជាឆ្នាំទី៤ហើយ ដែលអង្គរត្រូវបានភ្ញៀវទេសចរលើពិភពលោកបោះឆ្នោតគាំទ្រ ឲ្យទទួលបានចំណាត់លេខ១ជាប់ៗគ្នាតាមរយៈគេហទំព័រដ៏ល្បីល្បាញផ្សេងៗគ្នា ដោយកាលពីឆ្នាំ២០១៤ អង្គរបានជាប់ចំណាត់ថ្នាក់លេខ១ នៅលើគេហទំព័រមួយដែលតែងតែយកតំបន់បុរាណវិទ្យា និងប្រវត្តិសាស្ត្រទាំងអស់លើពិភពលោកមកប្រៀបធៀបគ្នា នោះគឺគេហទំព័រ ArchaeoMadness។
ហើយនៅដើមឆ្នាំ២០១៥ ប្រាសាទអង្គរខ្មែរទទួលបានចំណាត់ថ្នាក់លេខ១ម្តងទៀត នៅលើគេហទំព័រអន្តរជាតិមួយ ឈ្មោះ គេហទំព័រ TripAdvisor ដែលបានផ្សព្វផ្សាយតំបន់ទេសចរណ៍ល្បីៗលើពិភពលោក។
មួយឆ្នាំក្រោយមកពីនៅឆ្នាំ២០១៦កន្លងទៅ ប្រាសាទអង្គរក៏បានបន្តជាប់លេខ១បន្ថែមទៀត នៅលើគេហទំព័ររបស់ក្រុមហ៊ុន Lonely Planet ដែលជាគេហទំព័រផ្សព្វផ្សាយ និងជាប្រភពព័ត៌មានទេសចរណ៍ដ៏ល្បីមួយលើពិភពលោក មានទាំងព័ត៌មានតាមរយៈវែបសាយ ទស្សនាវដ្តី និងសៀវភៅ ជាដើម។
ការគាំទ្រពីសំណាក់ភ្ញៀវជាតិនិងអន្តរជាតិឲ្យប្រាសាទអង្គររបស់ខ្មែរជាប់ចំណាត់ថ្នាក់លេខ១ជាប់គ្នានៅបួនឆ្នាំមកនេះ ពិតជាមោទនភាពជាទីបំផុតរបស់ជនជាតិខ្មែរយើងដូច្នេះសូមបងប្អូនខ្មែរទាំងអស់បន្តចូលរួមថែរក្សា ការពារនូវបេតិកភណ្ឌរបស់ដូនតាយើងឲ្យបានខ្លាំងក្លាដើម្បីភាពគង់វង្សយូរអង្វែងតទៅ៕
