ប្រទេស ថៃ បានដកចេញនូវការគំរាមបិទដំណើរការ Facebook ក្នុងប្រទេស ប៉ុន្តែរដ្ឋាភិបាលបានស្នើដល់តុលាការឲ្យចេញដីកាបិទគេហទំព័រចំនួន ១៣១ ដែលចុះផ្សាយមានលក្ខណប្រមាថដល់មហាក្សត្ររបស់ប្រទេស ថៃ ។
អគ្គលេខាធិការផ្នែកត្រួតពិនិត្យការផ្សព្វផ្សាយក្នុងប្រទេស ថៃ លោក ថាកន តានថាស៊ីត និយាយថា ក្រុមហ៊ុន Facebook ស្នើសុំដីកាពីតុលាការមុនពេលក្រុមហ៊ុនអនុវត្តតាមសំណើរបស់រដ្ឋាភិបាល ថៃ ដូច្នេះហើយ រដ្ឋាភិបាលសម្រេចដកចេញនូវការគំរាមបិទ Facebook ដោយស្នើដល់តុលាការឲ្យចេញដីកាបិទគេហទំព័រទាំងឡាយណាដែលបំពានលើច្បាប់ហាមបះពាល់រាជវង្ស ថៃ ។
សូមបញ្ជាក់ថា កាលពីសប្ដាហ៍មុន រដ្ឋាភិបាល ថៃ គំរាមមិនឲ្យក្រុមហ៊ុន Facebook មិនឲ្យដំណើរការក្នុងប្រទេស ថៃ តទៅទៀត ដោយសារតែក្រុមហ៊ុនបណ្ដាញសង្គមធំបំផុតមួយនេះ មិនព្រមលុបរូបភាពដែលចុះផ្សាយប្រមាថដល់មហាក្សត្រ ថៃ ចំនួន ១៣១ តាមការទាមទារ ដែលមានន័យថា អ្នកប្រើប្រាស់ Facebook ក្នុងប្រទេស ថៃ ប្រឈមនឹងការបាត់បង់សិទ្ធិប្រើប្រាស់ Facebook ទាំងស្រុង ប្រសិនបើរដ្ឋាភិបាល និងក្រុមហ៊ុនមិនអាចព្រមព្រៀងគ្នាបាន ។
ក្រុមហ៊ុន Facebook បានបដិសេធមិនព្រមលុបចោលរូបភាព និងអត្ថបទដែលអ្នកប្រើប្រាស់ចុះផ្សាយបង្ហាញពីរូបភាពមានលក្ខណប្រមាថមហាក្សត្រជាច្រើនសន្លឹក ដូចជា រូបភាពដែលមហក្សត្រ មហាវ៉ាជិរ៉ាឡុងកន ពាក់អាវពាក់អាវអ៊ៀម បញ្ចេញរូបសាក់ពេញខ្លួន ជាវីដេអូក្នុងពេលដែលព្រះអង្គចូលហាងទំនិញ ហើយអាជ្ញាធរ ថៃ បានស្នើឲ្យក្រុមហ៊ុន Facebook លុបវីដេអូនោះជាបន្ទាន់ ។
