យោងតាមការចុះផ្សាយរបស់សារព័ត៌មាន Channel News Asia នៅព្រឹកថ្ងៃសុក្រមុននេះបន្តិចថា ក្រុមសកម្មប្រយុទ្ធជ្រុលនិយមរដ្ឋអុីស្លាម (ISIS) បានចេញប្រកាសខ្លួនទទួលខុសត្រូវចំពោះការវាយប្រហារបំផ្ទុះគ្រាប់បែកទៅលើរថយន្តក្រុងជាច្រើនគ្រឿង នៅស្ថានីយទីក្រុង ហ្សាកាតា (Jakarta) ប្រទេសឥណ្ឌូណេស៊ី កាលពីថ្ងៃពុធសប្ដាហ៍នេះ។
ISIS ប្រកាសតាមរយៈទីភ្នាក់ងារសារព័ត៌មាន Amaq ថា ការវាយប្រហារដ៏កក្រើកមួយនៅឥណ្ឌូណេស៊ី ក្នុងស្ថានីយរថយន្តក្រុង ហ្សាការតា ចំពេលដែលចេញដំណើរនោះ គឺជាស្នាដៃរបស់ខ្លួន ដោយពួកគេបានសម្លាប់ប៉ូលិសចំនួន ៣នាក់ និង១២នាក់ផ្សេងទៀតរងរបួស។ ក្រុមជ្រុលនិយមមួយនេះថែមទាំងបានគំរាមទៀតថា ទីក្រុងខាងលើគឺជាមុខសញ្ញាសំខាន់សម្រាប់ធ្វើការវាយប្រហារ។
គួររម្លឹកផងដែរថា កាលពីឆ្នាំ២០១៦ ទីក្រុង ហ្សាការតា ត្រូវបានក្រុមសកម្មប្រយុទ្ធបើកការវាយប្រហារបំផ្ទុះគ្រាប់បែកអត្តឃាតម្ដងរួចមកហើយ គ្រានោះបណ្ដាលឲ្យមានមនុស្សស្លាប់ចំនួន ៨នាក់ និងរាប់សិបនាក់រងរបួស៕
