សហព័ន្ធបាល់ទាត់ឥណ្ឌា បានធ្វើរបាយការណ៍អំពីលទ្ធផលនៃការប្រកួតមិត្តភាពអន្តរជាតិគឺជម្រើសជាតិឥណ្ឌា U17 បានយកឈ្នះអ៊ីតាលី U17 ប៉ុន្តែរបាយការណ៍បានបំផ្លើសទាំងស្រុង។
សហព័ន្ធបាល់ទាត់យក្សអាស៊ីខាងត្បូងមួយនេះ បានសរសេរនិងផុសក្នុងគណនី Twitter ផ្លូវការរបស់ខ្លួនថា U17 ឥណ្ឌាបានយកឈ្នះ U17 អ៊ីតាលី បំបែកកំណត់ត្រាប្រវត្តិសាស្ត្រ ប៉ុន្តែការពិតក្រុមដែលU17 ឥណ្ឌាឈ្នះ U17អ៊ីតាលី២ទល់០គឺជាក្រុមមកពី Italian Lega Pro U17 ដែលជាក្រុមយុវជនលេងក្នុងលីកលំដាប់ក្រោមតំណាងក្រុមយុវជនឲ្យជម្រើសជាតិអ៊ីតាលីនោះទេ នេះបើតាមប្រភព Hindustan Times ដែលជាកាសែតធំជាងគេនៅឥណ្ឌាបានផ្សាយ។
ក្រុមយុវជនមកពីក្របខ័ណ្ឌ Lega Pro តំណាងឲ្យ U17 អ៊ីតាលីនេះ ជ្រើសរើសចេញពីក្លឹបលេងនៅលីកលំដាប់ទី៣ និងទី៤របស់ប្រព័ន្ធបាល់ទាត់អ៊ីតាលី ខណៈក្រុម U17 អ៊ីតាលីពិតៗកំពុងលេងក្នុងពានរង្វាន់ UEFA Under-17 European Championship ឯណោះ។
តាមរបាយការណ៍របស់សហព័ន្ធបាល់ទាត់ឥណ្ឌា (AIFF)មិនបានបញ្ជាក់ឲ្យច្បាស់ពីករណីនេះទេគឺថា ជាជម្រើសជាតិ U17 អ៊ីតាលីសុទ្ធៗ ធ្វើឲ្យអ្នកគាំទ្របាល់ទាត់ឥណ្ឌាជឿថា ក្រុមរបស់គេអាចយកឈ្នះក្រុមលំដាប់យក្សមួយក្នុងពិភពបាល់ទាត់។ ខាងក្រោមនេះជា Twit របស់សហព័ន្ធបាល់ទាត់ឥណ្ឌា៖
ក្រុមជម្រើសជាតិអ៊ីតាលីមែនទែន ប្រមូលផ្ដុំទៅដោយយុវជនមានទេពកោសល្យដូចជា៖ Moise Kean និង Roberto Biancu របស់ Juventus Gabriele Bellodi របស់ AC Milan និងក្រុមយុវជនមកពីក្លឹប Inter ខ្លះទៀត។ ចំណែកក្រុមដែលចាញ់ជម្រើសជាតិឥណ្ឌា U17នេះមកពី Modena, Cremonese និង Padova ក្នុងលីកលំដាប់ទី៣និងទី៤ទៅវិញទេ។
ឥណ្ឌានឹងធ្វើជាម្ចាស់ផ្ទះពានរង្វាន់ FIFA U-17 World Cupនៅចុងឆ្នាំនេះ។ពួកគេធ្លាប់បានចូលរួមលេងក្នុងព្រឹត្តិការណ៍ Granatkin Cup ក្នុងប្រទេសរុស្សី ដោយឆ្លងកាត់ការប្រកួត៦ដងចាញ់ទាំង៦ដង៕
ខាងក្រោមជាលិខិតប្រកាសរបស់ខាងភាគីអ៊ីតាលីដែលយកកីឡាករមកប្រកួតមិត្តភាពជាមួយឥណ្ឌា៖
