កូឡាឡាំពួរ៖ កងទ័ពអាកាសម៉ាឡេស៊ី បានរាយការណ៍ឲ្យដឹងថា យន្តហោះចម្បាំងចំនួន ១គ្រឿង បានបាត់ខ្លួននៅពេលធ្វើប្រតិបត្តិការ នៅភាគខាងជើងទីក្រុង Kuantan ក្បែរព្រំដែនទីក្រុង Pahang និងTerengganu ។ នេះបើយោងគេហទំព័រសារព័ត៌មាន channelnewsasia បានចេញផ្សាយនារសៀលថ្ងៃព្រហស្បតិ៍ ទី១៥ ខែមិថុនា ឆ្នាំ២០១៧។
កងទ័ពអាកាស បាននិយាយបន្តទៀតថា យន្តហោះចម្បាំងម៉ាក Hawk 108 បានហោះចេញពីមូលដ្ឋានទ័ពអាកាសមួយកន្លែង នៅក្នុងទីក្រុង Kuantan វេលាម៉ោង ១១ព្រឹក (ម៉ោងក្នុងស្រុក) ដើម្បីធ្វើប្រតិបត្តិការរុករក និងជួយសង្គ្រោះ ស្រាប់តែដាច់ការទាក់ទងជាមួយមូលដ្ឋានទ័ពអាកាស ភ្លាមៗតែម្ដង។
រដ្ឋមន្ត្រីក្រសួងការពារជាតិលោក Hishammuddin Hussein បានសរសេរសារមួយក្នុងកម្មវិធី Twitter សម្ដែងការព្រួយបារម្ភទៅលើឧប្បត្តិហេតុនេះ ហើយបានអធិស្ឋានឲ្យអ្នកបើកបរយន្តហោះឲ្យមានសុវត្ថិភាពត្រលប់មកវិញ៕
អ្នកបើកបរយន្តហោះចម្បាំង Hawk 108 ទាំង ២រូប ត្រូវបានគេរកឃើញនៅក្នុងវាលភក់មួយកន្លែងនៅជិតទីក្រុង Chukai និង Terengganu វេលាម៉ោង ២.៣០រសៀលនេះ។ ហើយគេកំណត់អត្តសញ្ញារបស់ជនរងគ្រោះទាំង ២រួមមាន លោក Hasri Zaharie អាយុ ៣១ឆ្នាំ និងលោក Yazmin Mohamed Yusof អាយុ ៣៩ឆ្នាំ។
