ប្រធានាធិបតីសហរដ្ឋអាមេរិក លោក ដូណាល់ ត្រាំ បានលើកឡើងនៅព្រឹកថ្ងៃសុក្រនេះថា អាមេរិកនឹងត្រូវបានដកចេញពីកិច្ចព្រមព្រៀងពិភពលោក ស្ដីអំពីអាកាសធាតុទីក្រុងប៉ារីស ដោយសង្កត់ធ្ងន់ថា ដំណោះស្រាយនោះគ្មានភាពយុត្តិធម៌ឡើយ រូបលោកថែមទាំងបានប្ដេជ្ញាធ្វើការ កែប្រែកិច្ចព្រមព្រៀង ហើយងាកមកចរចាលើកិច្ចព្រមព្រៀងថ្មីទៀតផង។
រដ្ឋាភិបាលអាមេរិកបានចេញសេចក្ដីប្រកាសតាមកញ្ចក់ទូរទស្សន៍រដ្ឋថា "ដើម្បីបំពេញភារកិច្ចរបស់ខ្ញុំ ក្នុងការការពារសន្តិសុខប្រទេស និងប្រជាជន យើងនឹងដកខ្លួនចេញពីកិច្ចព្រមព្រៀង អាកាសធាតុទីក្រុងប៉ារីស ប៉ុន្តែទីក្រុងវ៉ាស៊ីនតោន និងប៉ារីសនឹងធ្វើការចរចាទៅលើកិច្ចព្រមព្រៀងថ្មី"។
គួររម្លឹកផងដែរថា លោក ដូណាល់ ត្រាំ ធ្លាប់បាននិយាយនៅក្នុងសប្ដាហ៍នេះថា ការដកខ្លួនចេញពីកិច្ចព្រមព្រៀងអាកាសធាតុទីក្រុងប៉ារីស អាចនឹងជួយឲ្យអាមេរិកទាំងមូលមានសុវត្ថិភាពជាងមុន ហើយក៏អាចជួយដល់ អាជីវករ កម្មករ ប្រជាជនរបស់ខ្លួនផងដែរ៕
