សិល្បៈ ៖ ខណៈដែលតារាចម្រៀងល្បីៗជាច្រើនក្លាយជាម្ចាស់ផ្ទះវិឡាក្នុងបុរីទំនើបៗ និងមានតម្លៃដល់កន្លះលាន់ដុល្លារមក នៅពេលនេះតារាចម្រៀងវ័យក្មេងលោក ដួង វីរៈសិទ្ធ ក៏ចាប់ផ្ដើមបង្ហើបប្រាប់ គម្រោងរស់នៅក្នុងផ្ទះវិឡាផងដែរ ប៉ុន្តែប្រភេទផ្ទះដែលលោកបង់រស់នៅ នោះមានទីតាំងមិនស្ថិតក្នុងបុរីទេ គឺជាវិឡាមួយសង់នៅទីតាំងល្អមានសភាពស្ងប់ស្ងាត់ និងដាច់ដោយឡែកពីគេ។
តារាភាគច្រើនចូលចិត្តទិញផ្ទះរស់នៅក្នុងបុរីទំនើបៗ ដោយគេយល់ថា ក្នុងបុរីមានសុវត្ថិភាពល្អ ថ្លៃថ្នូរ និងងាយស្រួលលក់ចេញយកចំណេញផងដែរ។ ដោយឡែកតារាចម្រៀងលោក ដួង វីរៈសិទ្ធ ខណៈដែលអាជីពសិល្បៈរបស់ខ្លួនកំពុងតែហុចផលផ្លែផ្កាផងនោះ លោកក៏បានបោះគោលដៅរស់នៅក្នុងផ្ទះវិឡា ដូចរៀមច្បងៗ ខុសតែលោកមិនចង់រស់នៅក្នុងបុរីដែលមានមនុស្សអ៊ូអរនោះទេ។
ដួង វីរៈសិទ្ធ បញ្ជាក់ប្រាប់លោក តាន់ ចន្ថា អ្នកផលិតព័ត៌មាននៅ វេបសាយ Kqube.net នៅស្ថានីយទូរទស្សន៍បាយ័នកាលពីពេលថ្មីៗនេះថា សម្រាប់ផ្ទះរស់នៅលោកស្រឡាញ់ជាប្រភេទផ្ទះវិឡា មិនស្ថិតនៅកណ្ដាលក្រុងទេ គឺលោកចង់រស់នៅជាយក្រុងក្នុងតំបន់ដែលមានបរិយាកាសរាងប្រសើរ ហើយជាកន្លែងមួយស្ងប់ស្ងាត់ដាច់ពីគេ គឺមិននៅក្នុងបុរីដែលមានមនុស្សច្រើនទេ។
ម្ចាស់ពាន I am a singer Cambodia រូបនេះបន្តថា សម្រាប់ទីតាំង និងដីសម្រាប់សង់វិឡា លោកមានរួចហើយ តែលោកមិនទាន់ប្រាប់ទេ ព្រោះពេលនេះលោកកំពុងសន្សំលុយបន្ថែមមួយចំនួនទៀតទើបចាប់ផ្ដើមសាងសង់ ហើយវិឡានោះក៏ជាការច្នៃម៉ូដដោយរូបលោកផ្ទាល់ផងដែរ ៕
