ព្យុងយ៉ាង៖ និស្សិតសាកលវិទ្យាល័យអាមេរិកលោក Otto Warmbier ដែលត្រូវបានកាត់ទោសឲ្យជាប់ពន្ធនាគាររយៈពេល ១៥ឆ្នាំ កាលពីឆ្នាំមុននោះ នៅទីបំផុតត្រូវបានដោះលែងឲ្យមាន សេរីភាពវិញហើយ។ នេះបើតាមយោងតាមគេហទំព័រសារព័ត៌មាន CNN បានចុះផ្សាយនាព្រឹកថ្ងៃពុធ ទី១៤ ខែមិថុនា ឆ្នាំ២០១៧។
លោក Otto មានអាយុ ២២ឆ្នាំ គឺជានិស្សិតផ្នែកសេដ្ឋកិច្ច មកពីសាកលវិទ្យាល័យ Virginia របស់សហរដ្ឋអាមេរិក ហើយរូបលោក ត្រូវបានចាប់ខ្លួន និងកាត់ទោសដាក់ពន្ធនាគារ កាលពីខែមីនា ឆ្នាំ២០១៦កន្លងទៅ ក្រោមបទចោទប្រកាន់ថា ប្រព្រឹត្តឧក្រិដ្ឋកម្មប្រឆាំងនឹងរដ្ឋអំណាច។
អាជ្ញាធរកូរ៉េខាងជើង បាននិយាយថា "ពួកគេមានវីដេអូសន្តិសុខទាក់ទងរូបលោក កំពុងតែព្យាយាមលួចបដាពាក្យស្លោកនយោបាយ ដែលគេព្យួរនៅលើជញ្ជាំងសណ្ឋាគារក្រុងព្យុងយ៉ាង"។
គួរបញ្ជាក់ផងដែរថា លោក Otto បានធ្វើដំណើរតាមជើងហោះហើរ Medivac flight ទៅសហរដ្ឋអាមេរិក ដើម្បីជួបជុំបងប្អូន ក្រុមគ្រួសារសាច់ញាតិរបស់លោកវិញហើយ។ ទន្ទឹមគ្នានេះដែរ រដ្ឋមន្ត្រីការបរទេសអាមេរិក កំពុងតែបន្តជជែកពិភាក្សា ជាមួយកូរ៉េខាងជើង ពាក់ព័ន្ធនឹងជនជាតិអាមេរិកចំនួន ៣នាក់ផ្សេងទៀត ដែលត្រូវបានឃុំខ្លួននៅទីនេះ៕
