អត្ថបទ៖ ប៊ី សារី
អប់រំ៖ ក្មេងស្រីសិស្សសាលាម្នាក់បានបញ្ចេញភាពក្លាហាននិងគួរឲ្យស្ងើចសរសើរនូវទឹកចិត្តដ៏ល្អបរិសុទ្ធលាយឡំនិងទឹកហូរស្រិចៗផងនេះ បានធ្វើឲ្យកូនប្រុសច្បងនាយករដ្ឋមន្ត្រីកម្ពុជា អួលដើមក និងស្ទើរតែស្រក់ទឹកផ្នែកដោយមិនដឹងខ្លួន ជាមួយនឹងសម្តីដ៏មានអត្ថន័យប្រយោជន៍សម្រាប់ជាតិជាធំ ទោះគេបានទទួលមកខ្លួនផ្ទាល់ក៏ដោយ។
ចង់ដឹងថាមានសម្តីនោះមានខ្លឹមសារយ៉ាងណានោះ សូមមិត្តអ្នកអាន KQUBE អានសំណេរដើមរបស់ឯកត្តនិយម ហ៊ុន ម៉ាណែត ខាងក្រោម៖
"ពួកខ្ញុំសុំលោកពូនិងសម្ដេចអោយជួយកសាងអគារបន្ថែមនេះ ទោះបីជាពួកខ្ញុំនៅសល់តែពីរខែទៀតរៀនចប់នៅសាលានេះ ហើយត្រូវផ្តូរទៅរៀននៅវិទ្យាល័យក៏ដោយ ក៏ពួកខ្ញុំសុំ ដើម្បីកុំអោយសិស្សប្អូនខ្ញុំជំនាន់ក្រោយៗលំបាកដូចពួកខ្ញុំ" នេះជាសម្តីមួយឃ្លារបស់ក្មួយៗថ្នាក់ទី៩ (នៅអនុវិទ្យាល័យត្រពាំងបី ក្នុងឃុំតាកែន ស្រុកឈូក ខេត្តកំពត) ដែលខ្ញុំមិនអាចបំភ្លេចបាននិងសូមសរសើរដោយស្មោះ ពេលពួកគេសុំខ្ញុំអោយជួយកសាងអគារសិក្សាបន្ថែមមួយខ្នងទៀត ដោយសារសិស្សកាន់តែច្រើននិងមានការខ្វះខាតអគារសិក្សា។
ទោះបីជាក្មួយៗនៅក្មេង ប៉ុន្តែសម្តីមួយឃ្លានេះបានបង្ហាញពីឆន្ទៈនិងការគិតពីផលប្រយោជន៏រួម បើទោះជាក្មួយៗនឹងមិនបានទទួលផលនេះផ្ទាល់ ក៏ក្មួយៗចង់បានផលនេះទុកសម្រាប់សិស្សប្អូននិងលោកគ្រូអ្នកគ្រូរបស់ក្មួយៗដែរ ហើយនេះគឺជាអ្វីដែលគួរអោយគោរពណាស់។ (ជាការឆ្លើយតប សម្តេចឯកភាពផ្តល់ជូននូវអគារមួយខ្នង ៦បន្ទប់ និងអគារទីចាត់ការមួយខ្នង ដែលនឹងចាប់ផ្តើមដំណើរការសាងសង់ក្នុងពេលឆាប់ៗខាងមុខនេះ)”៕
