ក្រឡេកមកមើលស្ថានភាពនយោបាយ និងជម្លោះទ្វេភាគី អ៊ុយក្រែន និងរុស្ស៊ី ជុំវិញតំបន់គ្រីមៀវិញ ឃើញថា រដ្ឋាភិបាលអ៊ុយក្រែននៅតែទទូចយ៉ាងខ្លាំងឲ្យសហរដ្ឋអាមេរិកធ្វើអន្តរាគមន៍ទៅលើប្រទេសរុស្ស៊ី ដែលឈ្លានពាន ក៏ដូចជាការដាក់បញ្ចូលតំបន់មានជម្លោះខាងលើជា ឧបសម្ព័ន្ធរបស់ខ្លួនផងដែរ។
ជុំវិញបញ្ហាខាងលើនាពេលថ្មីៗនេះ លោកប្រធានាធិបតី អ៊ុយក្រែន Petro Poroshenko បានធ្វើដំណើរទស្សនកិច្ចទៅកាន់សេតវិមាន និងបានជួបពិភាក្សាជាមួយរដ្ឋាភិបាលអាមេរិកលោក ដូណាល់ ត្រាំ ដាក់ទណ្ឌកម្មបន្ថែមទៀតទៅលើទីក្រុងម៉ូស្គូ និងទាមទារឲ្យមេដឹកនាំ លោក ពូទីន ដកខ្លួនចេញពីតំបន់គ្រីមា។
ក្នុងកិច្ចប្រជុំជាមួយអនុប្រធានាធិបតីអាមេរិកលោក Mike Pence រដ្ឋាភិបាលអ៊ុយក្រែនបានថ្លែងអំណរគុណយ៉ាងខ្លាំង ចំពោះការខិតខំប្រឹងប្រែងដោះស្រាយបញ្ហា និងគាំទ្រលើគោលនយោបាយរបស់ខ្លួន។ Petro Poroshenko លើកឡើងថា យើងនឹងប្រយុទ្ធប្រឆាំង ដើម្បីនាំឲ្យបានមកវិញ នូវសេរីភាព និងលទ្ធិប្រជាធិបតេយ្យ ចំពេលដែលអ៊ុយក្រែនកំពុងមានជម្លោះជាមួយរុស្ស៊ី។
គួរបញ្ជាប់ថា ដំណើរទស្សនកិច្ចរបស់មេដឹកនាំអ៊ុយក្រែន គឺក្នុងគោលបំណងជុំរុញឲ្យទីក្រុងវ៉ាស៊ីនតោន ដាក់សម្ពាធបន្ថែមទៅលើទីក្រុងម៉ូស្គូ បន្ទាប់ពីក្រសួងរតនាគារសហរដ្ឋអាមេរិក បានប្រកាសកាលពីថ្ងៃអង្គារថា ខ្លួននឹងបន្ថែមអង្គភាពចំនួន ៣៨ផ្សេងទៀត ចូលក្នុងបញ្ជីទណ្ឌកម្មនៃការិយាល័យគ្រប់គ្រងទ្រព្យសម្បត្តិបរទេសរបស់ខ្លួន ដើម្បីជាការព្រមានដល់សកម្មភាពឈ្លានពានរបស់រុស្ស៊ី៕
