យោងតាមរបាយការណ៍មួយ ចុះផ្សាយដោយសារព័ត៌មាន RT ថា ទឹកប្រាក់ចំនួន ១១០ពាន់លានដុល្លារអាមេរិក ដែលលោកប្រធានាធិបតី ដូណាល់ ត្រាំ បានចុះកិច្ចហត្ថលេខាជាមួយ អារ៉ាប៊ីសាអ៊ូឌីត លើកិច្ចព្រមព្រៀងលក់អាវុធនោះ ត្រូវបានគេសន្និដ្ឋានថា វាជាការប្រថុយប្រថានបំផុត ហើយវាមិនអាចមានតម្លៃដ៏លើសលប់បែបនេះឡើយ។
កាលពីថ្ងៃទី២០ ខែឧសភាកន្លងទៅ ប្រធានាធិបតីអាមេរិក លោក ត្រាំ បានចរចាគ្នាទៅលើកិច្ចព្រមព្រៀងលក់អាវុធជាមួយទីក្រុងរីយ៉ាដ ដោយប្រទេសមហាអំណាចមួយនេះ នឹងយល់ព្រមលក់អាវុធទៅឲ្យក្នុងតម្លៃ ១១០ពាន់លានដុល្លារ ដើម្បីគាំទ្រដល់កិច្ចការពារសន្តិសុខរយៈពេលយូរអង្វែងមួយនៅលើតំបន់ Gulf ក៏ដូចជាអារ៉ាប៊ីសាអ៊ូឌីតទាំងមូលផងដែរ។
អ្នកជំនាញផ្នែកសព្វាវុធមួយចំនួនបានលើកឡើងថា សម្ភារៈយោធាភាគច្រើនដែលលក់ឲ្យទីក្រុងរីយ៉ាដ មិនមែនចេញពីមន្ទីរការពារជាតិរបស់អាមេរិកឡើយ មានន័យថា វាមិនជាឧស្សាហកម្មក្នុងប្រទេសនោះទេ។ របាយការណ៍ចេញពីសេតវិមាន ស្ដីពីបញ្ជីប្រភេទអាវុធដែលត្រូវលក់មានដូចជា៖ មីស៊ីលប្រឆាំងយន្តហោះជាង ១សែនគ្រាប់ ក្នុងតម្លៃ ៤.៤៦ពាន់លានដុល្លារ ប្រព័ន្ធចាប់សញ្ញាដែលអាកាស ក្នុងតម្លៃ ២ពាន់លានដុល្លារ យន្តហោះចម្បាំងបួនគ្រឿងតម្លៃ ២ពាន់លានដុល្លារ ប្រព័ន្ធប្រឆាំងមីស៊ីលប៉ាទ្រីយ៉ូត តម្លៃ ៦.៦៥ពាន់លានដុល្លារ ប្រព័ន្ធការពារមីស៊ីល THAAD តម្លៃ ១៣.៥ពាន់លានដុល្លារ និងផ្កាយរណបចាប់សញ្ញាចំនួន២ តម្លៃ ៨លានដុល្លារ...។
សារព័ត៌មានការពារជាតិ Defense News បានបញ្ជាក់ទៀតថា កាលបរិច្ឆេទ ដែលរដ្ឋាភិបាល អារ៉ាប៊ីសាអ៊ូឌីត ត្រូវទទួលបានអាវុធទាំងអស់ នៅឆ្នាំ២០២៣ និង ២០២៦ ខាងមុខ។ កិច្ចការដ៏ធំខាងលើនេះ ក៏មានការចូលរួមចរចាពីអតីតប្រធានាធិបតី លោក អូបាម៉ា ផងដែរ ដោយលោកនិយាយថា "វាជាការប្រថុយបំផុត! ទីក្រុងរីយ៉ាដនឹងមិនមានលទ្ធភាពចំណាយលុយរហូតដល់ ១១០ពាន់លានដុល្លារ លើការទិញអាវុធនេះឡើយ"។
គួរបញ្ជាក់ផងដែរថា លោក ដូណាល់ ត្រាំ ត្រូវបានប្រទេសជិតខាងមួយចំនួនរិះគន់ថា យកប្រទេស អុីរ៉ង់ មកធ្វើជាមូលហេតុ ដោយរូបលោកធ្លាប់បាននិយាយថា អារ៉ាប៊ីសាអ៊ូឌីតនឹងមានអាវុធទាំងអស់នោះ សម្រាប់ការពារការគំរាមកំហែងពីទីក្រុងតេអេរ៉ង់ និងប្រយុទ្ធប្រឆាំងក្រុមសកម្មប្រយុទ្ធ ISIS ៕
