ក្នុងសន្និសីទកាសែត មុនការប្រកួតមិត្តភាពរវាងកម្ពុជា និងឥណ្ឌូណេស៊ី លោក Leonardo Vitorino បាននិយាយថា ការប្រកួតនេះផ្ដោតសំខាន់ទៅទម្រង់លេងរបស់កូនក្រុម ជាងលទ្ធផល ពីព្រោះអ្វីដែលសំខាន់គឺការជួប អាហ្វហ្គានីស្ថានក្នុងវគ្គជម្រុះ AFC Asian Cup2019 នៅថ្ងៃទី១៣មិថុនាខាងមុខ។
“សម្រាប់ថ្ងៃស្អែក! ទម្រង់លេងរបស់ក្រុមទាំងមូល មានសារសំខាន់ជាងលទ្ធផលនៃការប្រកួត ពីព្រោះតែ ក្រុមឥណ្ឌូណេស៊ីពង្រឹងក្រុមត្រៀម AFC U-23 Championship វគ្គជម្រុះហើយយើងត្រៀមខ្លួនទទួលភ្ញៀវអាហ្វហ្គានីស្ថានក្នុង AFC Asian Cup” សម្ដីគ្រូបង្វឹកសញ្ជាតិប្រេស៊ីល។
លោកបានបន្តថា៖" យើងនឹងប្រើប្រាស់កីឡាករវ័យក្មេងខ្លះៗ ពីរបៀបលេង ហើយមើលទម្រង់លេងរបស់ពួកគេអាចធ្វើបានកម្រិតណា ពេលជួបអាហ្វហ្គានីស្ថាន។ ថ្ងៃស្អែកគឺជាការប្រកួតដ៏ល្អមើលមួយដោយសារពួកគេ (ឥណ្ឌូណេស៊ី)ជាក្រុមដ៏ល្អមួយ ហើយយើងក៏មានដំណើរការល្អមកខ្លះហើយដែរ។"
ក្រុមទាំងពីរនឹងជួបគ្នានៅវេលាម៉ោង៦និង៣០នាទីល្ងាចថ្ងៃទី៨ខែមិថុនាឆ្នាំ២០១៧ក្នុងពហុកីឡដ្ឋានជាតិអូឡាំពិក។
