ក្រុមអ្នកតវ៉ាជាច្រើននាក់ បានរួមគ្នាដង្ហែក្បួន ធ្វើបាតុកម្មនៅក្នុងទីក្រុងឡុងដ៍ ប្រទេសអង់គ្លេស ទាក់ទងនឹងការបាត់បង់ជីវិតរបស់បុរសស្បែកខ្មៅម្នាក់ ដែលត្រូវបានមន្ត្រីប៉ូលិសសម្លាប់។ នេះបើតាម យោងតាមគេហទំព័រសារព័ត៌មាន រុស្ស៊ី(RT) បានចុះផ្សាយនៅព្រឹកថ្ងៃចន្ទ ទី២៦ ខែមិថុនា ឆ្នាំ២០១៧។
ក្រុមបាតុករជាច្រើននាក់ បានធ្វើការតវ៉ាចំពោះការស្លាប់របស់លោក Edir Frederico Da Costa ដោយដុតបំផ្លាញសម្ភារៈសាធារណៈ នៅលើដងវិថី Richmond ក្នុងទីក្រុងឡុងដ៍ ព្រមទាំងស្រែកទាមទារថា "ពួកយើងចង់បានយុត្តិធម៌ សន្តិភាព និងប៉ូលិសដែលមិនប្រកាន់ជាតិសាសន៍" ស្របពេលដែលពួកគេប៉ះទង្គិចគ្នាជាមួយក្រុមមន្ត្រីប៉ូលិសការពារសណ្ដាប់ធ្នាប់ នៅខាងក្រៅស្ថានីយប៉ូលិស Forest Gate។ តាមសារព័ត៌មានអង់គ្លេស Guardian បានរាយការណ៍ថា ពុំមានការចាប់ខ្លួនក្រុមបាតុករនោះឡើយ ខណៈមន្ត្រីប៉ូលិសចំនួន ២នាក់ ទទួលរងរបួសស្រាល៕
គួរបញ្ជាក់ផងដែរថា លោក Da Costa មានអាយុ ២៥ឆ្នាំត្រូវបានគេវាយដំយ៉ាងសាហាវ បន្ទាប់ពីគេត្រូវបានមន្ត្រីប៉ូលិសបង្គាប់ឲ្យឈប់រថយន្ត នៅក្នុងតំបន់ Newham ភាគខាងកើតទីក្រុងឡុងដ៍ កាលពីថ្ងៃទី១៥ ខែមិថុនា៕
