មន្រ្តីអាមេរិកមួយរូបបានអះអាងថា ក្រុម hacker របស់រុស្សីបានធ្វើការវាងប្រហារទៅលើរដ្ឋចំនួន ២១ក្នុងអំឡុងពេលបោះឆ្នោតជ្រើសរើសប្រធានាធិបតី ក្នុងឆ្នាំ២០១៦។ នេះបើយោងតាមការចុះផ្សាយនៅព្រឹកថ្ងៃព្រហស្បតិ៍ ទី២២ ខែមិថុនា ឆ្នាំ២០១៧។
មន្ត្រីជាន់ខ្ពស់អាមេរិក ធ្វើការនៅក្នុងក្រសួងទទួលបន្ទុកការងារសន្តិសុខជាតិលោកស្រី Jeanette Manfra បានបង្ហើបឲ្យដឹងថា ការជ្រៀតជ្រែករបស់រុស្ស៊ីក្នុងអំឡុងពេលបោះឆ្នោតកន្លងទៅ ក្រុម hacker វាយប្រហារសន្លឹកឆ្នោតក្នុងរដ្ឋចំនួន២១ ប៉ុន្តែលោកស្រីបានបដិសេធបញ្ជាក់ពីឈ្មោះ រដ្ឋទាំងនោះ ដោយរងចាំការសម្រេចចិត្តជាមុនពីសំណាក់ក្រុមសមាជិកសភាសិន។
ជាចុងក្រោយលោកស្រី Jeanette Manfra និយាយថា ទោះជាមានការលួចសន្លឹកឆ្នោតក៏ដោយ ក៏គ្មានភស្តុតាងណាមួយដែលអាចបញ្ជាក់ពីចំនួនសន្លឹកឆ្នោតច្បាស់លាស់នោះទេ។ យ៉ាងណាមិញរឿងក្ដីដ៏ចម្រូងចម្រាសនេះ សភានឹងធ្វើការប្រកាសឲ្យដឹងនៅពេលឆាប់ៗខាងមុខនេះ។
សូមបន្ថែមផងដែរថា ជុំវិញបញ្ហានេះវិមានក្រឹមឡាំងបានឆ្លើយតបវិញចំពោះ ការចោទប្រកាន់រុស្ស៊ីប្រើប្រព័ន្ធ Cyber លួចសន្លឹកឆ្នោត ដើម្បីជួយឲ្យលោកដូណាល់ ត្រាំ ជាប់ជាប្រធានាធិបតីនោះ គឺជាព័ត៌មានកុហក និងគ្មានមូលដ្ឋានច្បាស់លាស់៕
