រដ្ឋាភិបាលទីក្រុងប៉េកាំងទទូចឲ្យមហាអំណាចពិភពលោកកាត់បន្ថយសកម្មភាពទាំងឡាយណា ដែលបង្កភាពតានតឹងជាមួយកូរ៉េខាងជើង ហើយងាកមកចាប់ផ្ដើមកិច្ចចរចាជាមួយមេដឹកនាំរដ្ឋកុម្មុយនិស្ត លោក គីម ជុងអ៊ុន ដើម្បីបង្ការគ្រោះមហន្តរាយដ៏ធ្ងន់ធ្ងរនាពេលអនាគត។ នេះបើយោងតាមការចុះផ្សាយរបស់សារព័ត៌មាន Express នៅថ្ងៃអង្គា ទី០៤ ខែកក្កដា ឆ្នាំ២០១៧។
ទន្ទឹមគ្នានេះ លោក លៀ ជាយី (Liu Jieyi) អគ្គរដ្ឋទូតចិន នៅអង្គការសហប្រជាជាតិ បានព្រមានទៅកាន់មហាអំណាចពិភពលោកថា "មហន្តរាយនឹងកើតមាន ដោយសារការផ្ទុះឡើងនៃសង្គ្រាម ប្រសិនបើប្រទេសមួយចំនួនមិនព្រមបន្ធូរបន្ថយភាពតានតឹងជាមួយទីក្រុងព្យុងយ៉ាង"។
លោកអគ្គរដ្ឋទូត ចិន ខាងលើ មានប្រសាសន៍ក្នុងសន្និសីទសារព័ត៌មាន នៅទីស្នាក់ការ យូអិន ថា "បច្ចុប្បន្នភាពតានតឹងរវាងកូរ៉េខាងជើង និង កូរ៉េខាងត្បូង ក៏ដូចជាសហរដ្ឋអាមេរិក គឺកាន់តែខ្លាំងឡើងៗ ដែលយើងជឿជាក់ថា នឹងរីករាលដាលជាបន្តបន្ទាប់ ហើយមិនយូរទេ វានឹងគ្រប់គ្រងលែងបាន ដល់ពេលនោះនឹងមានមហន្តរាយកើតឡើងជាមិនខាន"៕
គួរបញ្ជាក់ផងដែរថា ការលើកឡើងខាងលើ ត្រូវបានធ្វើឡើងបន្ទាប់ពី កូរ៉េខាងត្បូង និងសម្ព័ន្ធមិត្តរបស់ខ្លួនបានប្ដេជ្ញា ប្រយុទ្ធប្រឆាំងនឹងកម្មវិធីនុយក្លេអ៊ែររបស់កូរ៉េខាងជើង ដោយប្រើសមត្ថភាពយោធាផ្ទាល់ និងប្រព័ន្ធការពារមីស៊ីល THAAD របស់អាមេរិកនៅកោះផេនីស៊ូឡាជាដើម៕
