កញ្ញា វីនវីន គឺជាតារាសម្ដែង និងម៉ូដែលបានចូលប្រឡូកអាជីពសិល្បៈមានរយៈពេលជាងពីរឆ្នាំទេ។ ពេលដ៏ខ្លីនេះកញ្ញាសម្ដែងខ្សែភាពយន្តបានជិតដប់រឿង ថតស្ពតពាណិជ្ជកម្មបានជិត១០ផលិតផល រួមនឹងសម្តែងខាអូខេច្រើនបទ និងគ្រប់ផលិតកម្មល្បីៗក្នុងស្រុកផងដែរ។ ភាពជោគជ័យនេះត្រូវបានកញ្ញា ប្រាប់ថា នាងមានគម្លិះធ្វើឲ្យអ្នកដឹកនាំរឿង និងអ្នកផលិតស្ពតចូលចិត្ត ទើបនាងចេះតែទទួលបានការងារជាបន្តបន្ទាប់។
មួយរយៈនេះស្រីស្អាតថ្ពាល់ខួចកញ្ញា វីនវីន ចាប់ផ្តើមបង្ហាញវត្តមានច្រើននៅលើឆាកសិល្បៈ តាមរយៈបង្ហាញមុខក្នុងខ្សែភាពយន្តភាគ និងរឿងខ្នាតធំ រួមជាមួយនឹងការថតស្ពតពាណិជ្ជកម្មផងដែរ។ ជាក់ស្ដែងថ្មីៗក្រោយពីបញ្ចប់ការខ្សែភាពយន្តរឿង ពន្លកស្នេហ៍យុវវ័យ រឿង ទេពធីតាម៉ាឡាកាំង និងរឿង ទាយាទអាគម កញ្ញាបានបង្ហាញមុខក្នុងស្ពតផលិតផលរក្សាសម្រស់ Alite រួមជាកញ្ញា ម៉ីអេនជែល និងកញ្ញា ខេខេ ដែលត្រៀមនឹងបង្ហាញនៅលើទីផ្សារក្នុងពេលដ៏ឆាប់ខាងមុខនេះ។
កញ្ញា វីនវីន បានប្រាប់ថា អាជីពសិល្បៈក្រៅពីមានរូបសម្រស់ និងទេពកោសល្យហើយ ក៏ទាមទារការជួយជ្រោមជ្រែងពីអ្នកដឹកនាំរឿង និងស្ពតពាណិជ្ជកម្មផ្សេងៗផងដែរ ព្រោះបើយើងមានតែរូបសម្បត្តិ និងសមត្ថភាពសម្ដែងតែបើខ្វះចំណុចខាងលើនេះទោះជាប្រឡូកអាជីពនេះយូរប៉ុនណាក៏មិនល្បីដែរ ព្រោះគ្រប់ការងារចាំបាច់ត្រូវឲ្យមានការប្រស្រ័យទាក់ទងល្អ។
តារាស្រីថ្ពាល់ខួចរូបនេះបន្តថា ចំណុចពិសេសរបស់នាងដែលធ្វើឲ្យអ្នកដឹកនាំរឿង និងអ្នកផលិតស្ពតចូលចិត្តនោះ គឺការគោរពពេលវេលាបានល្អ ការមិនកើតជំងឺបូសក្លៀក រួសរាយរាក់ទាក់ និងការទទួលខុសត្រូវចំពោះការងារ ដូចជាការព្យាយាមមើលសេណារីយោឲ្យចាំច្បាស់ ជាដើម។
កញ្ញា បន្តថា "ជាក់ស្ដែងថ្មីៗនេះខ្ញុំទើបតែបានថតស្ពតផលិតផលរក្សាសម្រស់Alite ដែលទើបនាំចូលមកពីក្រៅស្រុក ហើយការទទួលបានការងារនេះគឺនាងទទួលបានការComment អ្នកម្ចាស់ផលិតផល និងអ្នកផលិតស្ពតថា ជម្រើសដែលគាត់ទទួលយកនាង គឺមកពីគាត់មើលឃើញថា ខ្ញុំមានចំណុចខាងលើនេះដែលគាត់ចូលចិត្ត ចំពោះអ្នកសិល្បៈរូបណាដែលមិនកើតជំងឺខាងលើ ទើបធ្វើឲ្យការងារគាត់ជោគជ័យបានលឿន"៕
