នៅថ្ងៃទី២០ ខែកក្កដា មុននេះបន្តិច សារព័ត៌មាន BBC បានចុះផ្សាយថា អតីតមេបញ្ជាការយោធារបស់ប្រទេសថៃមួយរូប ត្រូវបានតុលាការសម្រេចកាត់ទោសជាប់ពន្ធនាគារចំនួន ២៧ឆ្នាំ ពីបទប្រព្រឹត្តអំពើជួញដូរមនុស្សនាពេលកន្លងមក។
តុលាការថៃបានសម្រេចកាត់ទោសអតីតមេបញ្ជាការកងទ័ពលោក Manas Kongpan ឲ្យជាប់ឃុំឃាំងរហូតដល់ ២៧ឆ្នាំ បន្ទាប់ពីរូបលោកត្រូវបានគេចោទប្រកាន់ថា មានជាប់ពាក់ព័ន្ធទៅនឹងការជួញដូរមនុស្សខុសច្បាប់ ជាមួយបក្សពួកប្រមាណជា ៦០នាក់ ដោយក្រុមប្រព្រឹត្តបទល្មើសទាំងនោះក៏កំពុងឈានទៅរកការចាប់ខ្លួនផងដែរ។
ប្រភពខាងលើបានបញ្ជាក់ថា សំណុំរឿងនេះបានកើតឡើងតាំងពីឆ្នាំ ២០១៥ ដោយតុលាការបានឃាត់ខ្លួនលោក Manas Kongpan ទុក ដើម្បីធ្វើការស៊ើបអង្កេត ខណៈដែលមេបញ្ជាការរូបនេះត្រូវបានរងការចោទប្រកាន់ពីបទ ជួញដូរក្រុមជនបរទេសមកពីប្រទេសបង់ក្លាដេស និងក្រុមជនជាតិដើមកាន់សាសនាអុីស្លាម មកពីមីយ៉ាន់ម៉ា៕
