មានហេតុការណ៍បំផ្ទុះគ្រាប់បែកកែឆ្នៃក្នុងរថយន្ត នៅភាគខាងលិចទីក្រុងកាប៊ុល (Kabul) ប្រទេសអាហ្វហ្គានីស្ថាន ដែលមានមនុស្សស្លាប់ និងរងរបួសជាច្រើននាក់។ នេះបើយោងតាមគេហទំព័រសារព័ត៌មាន Reuters បានចេញផ្សាយនាព្រឹកថ្ងៃច័ន្ទ ទី២៤ ខែកក្កដា ឆ្នាំ២០១៧។
អ្នកនាំពាក្យក្រសួងមហាផ្ទៃអាហ្វហ្គានីស្ថាន លោក Najib Danish បានប្រាប់ឲ្យដឹងថា មានសកម្មជនក្រុមរដ្ឋឥស្លាម (IS) ម្នាក់ បានបំផ្ទុះគ្រាប់បែកកែឆ្នៃក្នុងរថយន្ត នៅភាគខាងលិចទីក្រុងកាប៊ុល (Kabul) ដោយសម្លាប់មនុស្សយ៉ាងហោចណាស់ ២៤នាក់ និង៤០នាក់ផ្សេងទៀតរងរបួសយ៉ាងធ្ងន់ធ្ងរ។
ក្រោយពេលកើតហេតុមន្ត្រីប៉ូលិស បានរុំព័ទ្ធតំបន់កើតហេតុភ្លាមៗ ដែលស្ថិតនៅជិតផ្ទះរបស់អនុប្រធាននាយកប្រតិបត្តិរបស់រដ្ឋាភិបាលលោក Mohammad Mohaqiq នៅក្នុងទីក្រុងនេះ ដែលមានសហគមន៍ស៊ីអីុតសំខាន់ៗរស់នៅ ប៉ុន្តែពួកគេបាននិយាយថា គោលដៅនៃការវាយប្រហារនេះមិនទាន់ច្បាស់នៅឡើយទេ។
គួររម្លឹកផងដែរថា ការបំផ្ទុះគ្រាប់បែកអត្តឃាត ចុងក្រោយនេះ បានធ្វើឲ្យអំពើហិង្សាកើតឡើងជាងមុននៅក្នុងប្រទេសអាហ្វហ្គានីស្ថាន ខណៈដែលមានជនស៊ីវិលស្លាប់យ៉ាងហោចណាស់ ១៦៦២នាក់ នៅក្នុងឆ្នាំនេះ។ កាល ២សប្តាហ៍បន្ទាប់ពីក្រុមរដ្ឋឥស្លាម (IS) បានប្រកាសការវាយប្រហារទៅលើវិហារអីុស្លាម នៅក្នុងរដ្ឋធានីនេះ ដែលសម្លាប់មនុស្សយ៉ាងតិច ៤នាក់៕
