កំពង់ចាមៈ កាលពីវេលាម៉ោង៨និង៣០នាទីព្រឹកថ្ងៃទី២ ខែកក្កដា ឆ្នាំ២០១៧ ស្ត្រីម្នាក់ បានស្លាប់ភ្លាមៗនៅនឹងកន្លែងកើតហេតុ បន្ទាប់ពីជិះម៉ូតូឌុបក្មួយស្រីអាយុ៤ឆ្នាំ ខ្វះការប្រុងប្រយ័ត្នជ្រុលចង្កូតទៅបុកបង្គោលសុវត្ថិភាពនៅតាមចិញ្ចើមផ្លូវ ដោយបុកបង្គោលសុវត្ថិភាព នៅលើកំណាត់ផ្លូវជាតិលេខ៦ ស្ថិតក្នុងភូមិជាលា ឃុំជាលា ស្រុកបាធាយ ខេត្តកំពង់ចាម។
មុនពេលកើតហេតុ គេឃើញស្ត្រីម្នាក់ជិះម៉ូតូម៉ាកគុបជ្រុង ពណ៌ទឹកប៊ិច ពាក់ស្លាកលេខ តាកែវ 1E-5668 ដោយមានឌុបក្មេងស្រីម្នាក់ ដំណើរទិសដៅពីកំពង់ចាមឆ្ពោះទៅភ្នំពេញ លុះមកដល់ចំណុចកើតហេតុ មិនដឹងយ៉ាងមិច ម៉ូតូក៏រេចង្កូតជ្រុលទៅបុកបង្គោលសុវត្ថិភាពតាមចិញ្ចើមផ្លូវ បណ្ដាលឲ្យស្ត្រីអ្នកឌុបស្លាប់ភ្លាមៗនៅកន្លែងកើតហេតុ ចំណែកក្មេងស្រីនៅខាងក្រោយមិនរងរបួសនោះទេ។
សមត្ថកិច្ចមូលដ្ឋានបានចុះទៅដល់ បានឲ្យដឹងថា ជនរងគ្រោះឈ្មោះ អោក សារុន ភេទស្រី អាយុ៣៩ឆ្នាំ មានទីលំនៅភូមិត្រពាំងត្បាល់ ឃុំសូរសែន្យ ស្រុកពៃឈរ ខេត្តកំពង់ចាម (ស្លាប់ភ្លាមៗនៅកន្លែងកើតហេតុ)។ ចំណែកក្មួយស្រី ឈ្មោះហ័ង ជីញ ជីញ អាយុ៤ឆ្នាំ (គ្មានរបួស) ៕
