ស្នងការប៉ូលិសក្រុងសហរដ្ឋអាមេរិកលោក William McManus បាននិយាយប្រាប់ សារព័ត៌មាន CNN ថា មានហេតុការណ៍ដឹកជញ្ជូនជនភៀសខ្លួនម៉ិកស៊ីកូ តាមរថយន្តដឹកទំនិញមួយគ្រឿង ដែលបើកចេញពីព្រំដែន ម៉ិកស៊ីកូ មកទីក្រុង សាន់អាន់តូនីអូ (San Antonio) រដ្ឋ តិចសាស (Texas) ប្រទេសអាមេរិក។
ជនភៀសខ្លួនម៉ិកស៊ីកូ ៩នាក់ ត្រូវបានគេរកឃើញថាស្លាប់ កាលពីថ្ងៃអាទិត្យ ខែកក្កដា បន្ទាប់ពីត្រូវបានគេដាក់ក្នុងឡានដឹកទំនិញមួយគ្រឿង ដែលគេរកឃើញនៅក្នុងកន្លែងចតយានយន្ត Walmart នៅរដ្ឋ តិចសាស់ និង៣០នាក់ផ្សេងទៀត ត្រូវបានបញ្ជូនទៅមន្ទីរពេទ្យភ្លាមៗក្រោយពេលកើតហេតុការណ៍។ មេបញ្ជាការមន្ត្រីអគ្គីភ័យអាមេរិកលោក Charles Hood បានប្រាប់ឲ្យដឹងថា មនុស្សចំនួន ១៧នាក់ ដែលត្រូវបានដឹកទៅកាន់មន្ទីរពេទ្យនៅតាមតំបន់ ដែលមានស្ថានភាពធ្ងន់ធ្ងរ ដោយសារទទួលរងពីជំងឺដាច់សរសៃឈាមខួរក្បាល និងកង្វះជាតិទឹក។
ក្នុងហេតុការណ៍ខាងលើ ស្នងការប៉ូលិសក្រុង បានប្រាប់ទៀតថា ជនភៀសខ្លួនស្លាប់ភាគច្រើន គឺជាមនុស្សពេញវ័យ និងកូនសិស្ស ២នាក់។ ជុំវិញរឿងនេះ អាជ្ញាធរមិនបានបញ្ចេញឈ្មោះជនរងគ្រោះ ឬអត្តសញ្ជាតិ ដល់អ្នកសារព័ត៌មាននោះទេ គ្រាន់តែជូនដំណឹងដល់ក្រុមគ្រួសារពួកគេ៕
