វ៉ាស៊ីនតោន៖ សារព័ត៌មាន CNN ចុះផ្សាយថា កាលថ្ងៃព្រហស្បតិ៍ និង ថ្ងៃសុក្រម្សិលមិញ យន្តហោះទម្លាក់គ្រាប់បែករបស់សហរដ្ឋអាមេរិកចំនួន ២គ្រឿង បានហោះឆ្វែលនៅក្បែរតំបន់ដែនទឹកមានជម្លោះ ភាគខាងកើត នៃសមុទ្រចិនខាងត្បូង និងថែមទាំងបានរួមគ្នាធ្វើសមយុទ្ធជាមួយយន្តហោះប្រយុទ្ធជប៉ុនជាច្រើនគ្រឿងទៀតផង ចំពេលដែលកម្ដៅនៃភាពតានតឹងកើនឡើងជាមួយទីក្រុងប៉េកាំង និងកូរ៉េខាងត្បូង។
ប្រភពខាងលើបន្ថែមថា យន្តហោះទម្លាក់គ្រាប់បែកអាមេរិក ២គ្រឿង បូករួមទាំងយន្តហោះប្រយុទ្ធជប៉ុន ២គ្រឿងទៀតបានរួមគ្នាធ្វើសមយុទ្ធយ៉ាងកក្រើក នៅភាគខាងកើត នៃសមុទ្រចិនខាងត្បូង ខណៈដែលសម្ព័ន្ធមិត្តទាំងពីរបានអះអាងពីទំនួលខុសត្រូវថា សកម្មភាពនេះគឺសម្រាប់ត្រៀមខ្លួនទប់ទល់ជាមួយចិន និងសម្ព័ន្ធមិត្តជិតស្និទ្ធរបស់ខ្លួន។
យោងតាមសេចក្ដីថ្លែងការណ៍របស់មេបញ្ជាការកងកម្លាំងអាកាសប៉ាស៊ីហ្វិកលោក Ryan Simpson បានឲ្យដឹងថា "ការហោះហើរ និងការធ្វើសមយុទ្ធនាពេលរាត្រីជាមួយសម្ព័ន្ធមិត្តរបស់យើង គឺប្រកបដោយសុវត្ថិភាព ភាគីទាំងពីរបានចែករំលែកសមត្ថភាពយោធាគ្នាទៅវិញទៅមកយ៉ាងមានប្រសិទ្ធភាព”។
ជុំវិញការធ្វើសមយុទ្ធនេះដែរ គឺចាប់ផ្ដើមចំពេលដែលតានតឹងកាន់តែខ្លាំងរវាងសហរដ្ឋអាមេរិក កូរ៉េខាងត្បូង ជប៉ុន និងកូរ៉េខាងជើង ដែលកំពុងជះឥទ្ធិពលដល់ចិន និងរុស្ស៊ី ខណៈប្រទេសមហាអំណាចប្ដេជ្ញាការពារទឹកដីផ្ទាល់ខ្លួន នឹងសម្ព័ន្ធមិត្តពីការគំរាមកំហែងរបស់ទីក្រុងព្យុងយ៉ាង តាមរយៈសង្គ្រាមនុយក្លេអ៊ែរ៕
