សិល្បៈ ៖ តារាសម្ដែង និងម៉ូដែលកញ្ញា ខេខេ ទើបតែចូលប្រឡូកអាជីពសិល្បៈបានរយៈពេលពីរឆ្នាំទេ ប៉ុន្តែប្រិយភាពតារាស្រីរូបស្រស់ម្នាក់នេះកំពុងវាទយកទីផ្សារសម្ដែងឈុតស្រើបស្រាលផ្អើលអស់អ្នកដឹកនាំសម្ដែងក្នុងស្រុកទៅហើយ។ ភាពជោគជ័យនេះមិនមែនបានមកដោយងាយនោះទេ គឺបានឆ្លងកាត់ការរិះរកវិធីសាស្ត្រសម្ដែងអស់ពីរឆ្នាំមកហើយ។ ជាមួយគ្នានេះកញ្ញា ក៏បានបញ្ជាក់ប្រាប់គន្លឹះថតឈុតទាំងនេះទុកជាបទពិសោធន៍ និងឲ្យអ្នកគាំទ្រស្ដាប់កំដរអារម្មណ៍ផងដែរ។
ពេលផ្ដល់បទសម្ភាសន៍ជាមួយលោក តាន់ ចន្ថា អ្នកផលិតព័ត៌មានវេបសាយ Kqube.net តារាសម្ដែងបង្ហាញវត្តមានច្រើនក្នុងឈុតស្នេហាស្រើបស្រាលកញ្ញា ខេខេ បានប្រាប់ថា ការឈានជើងចូលសិល្បៈដំបូងឡើយនាងចង់សម្ដែងជាតួកាច ប៉ុន្តែពេលជ្រើសរើសតួម្ដងៗអ្នកដឹកនាំគ្រប់រូបតែបាន Comment ថា ទម្រង់មុខនាងថតមិនស៊ីទេតួកាច គឺស៊ីតែតួសិចស៊ី និងឈុតស្នេហា រួចគេក៏រុញនាងទៅសម្ដែងតួបែបនេះតែម្ដង។
កញ្ញាបន្តថា ដំបូងឡើយនាងមិនចេះសម្ដែងទេ ព្រោះអៀនខ្មាសច្រើន គឺថតមិនចូលតួឡើយ ធ្វើឲ្យនាងត្រូវមាត់អ្នកដឹកនាំមិនតិចទេ រហូតនាងរកបោះបង់អាជីពនេះថែមទៀតផង ប៉ុន្តែក្រោយពីគិតខ្លាចខ្មាសគេចូលហើយមិនទាន់មានកេរ្តិ៍ឈ្មោះផងក៏បាត់មុខទៅវិញ នាងក៏រិះរកវិធីសាស្ត្រ និងដាក់ចិត្តសម្ដែងឈុតស្នេហារហូតទាល់តែបានល្អ និងល្បីឈ្មោះមកដល់សព្វថ្ងៃ។
ខេខេ "ចា៎ បងសព្វថ្ងៃខ្ញុំហ៊ានទទួលថតគ្រប់ឈុតស្នេហាទាំងអស់ លើកលែងតែឈុតថតលើគ្រែស្រស់ៗតែម្ដងទើបខ្ញុំមិនហ៊ាន តែបើថាត្រឹមឈុតថើប ស្ទាប់អង្អែល គឺមិនជាបញ្ហាទេ ព្រោះខ្ញុំធ្លាប់ថតឈុតបែបនេះជាមួយតួប្រុសជាង១០នាក់មកហើយ គឺថតបានល្អអ្នកដឹកនាំពេញចិត្តតែម្ដង"។
តារាស្រីរូបនេះបន្តប្រាប់ពីគន្លឹះពិសេសក្នុងការសម្ដែងឈុតស្នេហាដែរថា "ការសម្ដែងឈុតស្នេហាឲ្យបានល្អមិនជាងាយស្រួលទេ គឺខ្ញុំត្រូវដាក់អារម្មណ៍ឲ្យដូចដៃគូមែនទែនអ៊ីចឹង "។ ជាមួយគ្នានេះ ខេខេ ក៏បានបញ្ជាក់អារម្មណ៍ពិតពេលសម្ដែងដែរថា "បងអើយ !ពេលសម្ដែងម្ដងៗខ្ញុំស្រៀវណាស់ ដូចបងដឹងស្រាប់ហើយស្រី និងប្រុសពេលនៅជិតគ្នា ហើយស្ទាប់អង្អែលចឹងទៀត គឺពិបាកនិយាយណាស់...។ តែពេលសម្ដែងហើយខ្ញុំមិនដែលហ៊ានមើលវីដេអូដែលខ្លួនសម្ដែងទេ គឺអៀនខ្លួនណាស់ "៕
