រាជធានីភ្នំពេញ៖ លោក ឡុង ឌីម៉ង់ ឯកអគ្គរាជទូតកម្ពុជាប្រចាំកូរ៉េខាងត្បូង បានឲ្យដឹងថា អ៊ីម៉ែលរបស់លោក ត្រូវបានគេ Hack យកទៅប្រើប្រាស់ហើយ ក្នុងគោលបំណងទុច្ចរិត ដូច្នេះប្រសិនជាមានបងប្អូនណា ទទួលបាន Email របស់លោក ដូចរូបខាងក្រោម សូមកុំធ្វើតាមការណែនាំរបស់ Email ឲ្យសោះ ជៀសវាងមានបញ្ហា។ នេះបើយោងតាមហ្វេសប៊ុក ឈ្មោះ Long Dimanche បានឲ្យដឹងកាលពីព្រឹក ថ្ងៃទី ៦ ខែកក្កដា ឆ្នាំ២០១៧នេះ ។
យោងតាមសំណេរដើម របស់ហ្វេសប៊ុក ឈ្មោះ Long Dimanche បានបញ្ជាក់យ៉ាងដូច្នេះថា "សូមជម្រាបជូនបងប្អូននិងមិត្តភ័ក្ដិទាំងអស់ឲ្យបានជ្រាបថា E-mailរបស់ខ្ញុំដែលមានអាសយដ្ឋាន long_dimanche@yahoo.com ត្រូវបានចោរអ៊ីនធឺណេតយកទៅប្រើប្រាស់ក្នុងរូបភាពទុច្ចរិតផ្សេងៗទាក់ទិននឹងធនាគារជាដើម។
បច្ចុប្បន្ននេះ ខ្ញុំបានមានចាត់វិធានការណ៍ដើម្បីសង្គ្រោះ E-mail ខ្ញុំរួចហើយ។ អាស្រ័យហេតុនេះ បើសិនជាបងប្អូនណាបានទទួល E-mail ពីខ្ញុំទាក់ទិននឹងប្រធានបទខាងលើដូចមានភ្ជាប់ជូនរូបភាពខាងលើនេះ សូមមេត្តាកុំបើកនិងធ្វើតាមការណែនាំរបស់ពួកវាឲ្យសោះ"។