ខេត្តឧត្តរមានជ័យ៖ ទឹកក្នុងអាងតាម៉ុក បានវិលមករកស្ថានភាពដើមវិញហើយ ហើយបើគិតត្រឹមម៉ោង ៦ ព្រឹក ថ្ងៃទី ២៨ ខែកក្កដា នេះ ដោយទឹកក្នុងអាងបានស្រកផុតកម្រិតប្រកាសឱ្យប្រុងប្រយ័ត្ន ០,១៥ ម៉ែត្រ គឺមកនៅត្រឹមកម្ពស់ ២,៧៥ ម៉ែត្រ។ ប៉ុន្តែទោះបីជាយ៉ាងនេះក្តី សូមបងប្អូនមានការប្រុងប្រយ័ត្នខ្ពស់ ពិសេសក្មេងៗ ដែលអាចនឹងងាយរងគ្រោះដោយសារជំនន់ទឹកភ្លៀងនេះ។
គួររម្លឹកផងដែរថា កាលពីម៉ោង១ រសៀលថ្ងៃទី ២៦ ខែកក្កដានេះ ទឹកអាងតាម៉ុក ស្ថិតក្នុងឃុំអន្លង់វែង ស្រុកអន្លង់វែង បានហក់ឡើងលើសកម្រិតប្រកាសអាសន្ន យ៉ាងខ្លាំងដោយទឹកក្នុងអាងមានកម្ពស់ ៣,៤០ ម៉ែត្រ ខណៈកម្រិតកម្ពស់ប្រកាសឱ្យប្រុងប្រយ័ត្ននោះត្រឹមតែ ២,៩០ ម៉ែត្រ៕
