តារាច្រើនណាស់ដែលធ្លាប់ជាប់ឈ្មោះក្នុងបញ្ជីខ្មៅរបស់អ្នកគាំទ្រ លើអត្តចរិតមិនគួរឲ្យរាប់រក ដោយសាតែពេលល្បីឈ្មោះពួកគេតែងកើតជំងឺបូសក្លៀក តួឯកនិយម និងជំងឺលួតកម្ពស់គ្មានអ្នកស្មើ។ តែក្នុងចំណោមតារាទាំងនោះក៏មានអ្នកខ្លះមានមារយាទល្អ គួរឲ្យគាំទ្រផងដែរ។ ជាក់ស្ដែងនាយ គ្រឿន ដែលជាតារាកំប្លែង ពិធីករ និងសម្ដែងល្បីឈ្មោះមួយរូប លោកមិនត្រឹមតែទៅណាមកណាមានទស្សនិកជន មិត្តភ័ក្ដិរាប់រកច្រើនទេ សូម្បីតែអ្នកដឹកនាំកុន ស្ពតពាណិជ្ជកម្ម ក៏បានកោតសរសើរលោកថា ជាតារាមានចរិត និងទម្លាប់ល្អផងដែរ។
លោក អ៊ុច រ៉ាវុឌ្ឍ អ្នកផលិតស្ពតពាណិជ្ជកម្មបាននិយាយថា ក្នុងជីវិតជាអ្នកដឹកនាំការងារសម្ដែង និងស្ពតពាណិជ្ជកម្ម លោកធ្លាប់ជួបរឿងលំបាកច្រើន ពាក់ព័ន្ធតារាសម្ដែង ដោយសារពួកគេមិនគោរពពេលវេលា។ បើទោះជាកន្លងមក ការងាររបស់លោកបានទទួលជោគជ័យជាច្រើន តែក្នុងចំណោមនោះលោកធ្លាប់ជួបបញ្ហា និងឈឺក្បាលជាមួយតារាសម្ដែងមិនតិចទេ។
លោកបញ្ជាក់ថា តារាភាគច្រើនតែងមានអត្តចរិតឆ្មើងឆ្មៃ និងមិនគោរពពេលវេលាឡើយ ពោលគឺឲ្យតែល្បីបន្តិចតែងធ្វើចរិតគ្មានអ្នកខ្ពស់ស្មើ។ តែលោកទើបតែឃើញនាយ គ្រឿន ម្នាក់ទេ មានចំណុចល្អខុសប្លែកពីគេ ពោលគឺគាត់គោរពពេលវេលា និងមានអត្តចរិតល្អណាស់ មិនចេះប្រកាន់ខ្លួនជាតារាល្បីទេ។
អ្នកផលិតស្ពតរូបនេះបន្តថា "សម្រាប់នាយ គ្រឿន ខ្ញុំធ្វើការងារជាមួយគាត់តាំងពីមិនទាន់ល្បីខ្លាំង រហូតដល់គាត់ល្បីខ្លាំង តែខ្ញុំសង្កេតឃើញថា បច្ចុប្បន្នគាត់កាន់តែដាក់ខ្លួនខ្លាំង រួសរាយរាក់ទាក់ជាមួយក្រុមការងារ ជាពិសេសរឿងពេលវេលាវិញមិនធ្វើឱ្យខ្ញុំឈឺក្បាលទេ។ ខ្ញុំណាត់ម៉ោង6 គាត់មករង់ចាំដល់កន្លែងតាំងពីម៉ោងជាង 5ម្ល៉េះ"។
នាយ គ្រឿន បញ្ជាក់ដែរថា សម្រាប់រូបលោកពិតជាសប្បាយចិត្តណាស់នៅពេលបានឃើញគេសរសើរនូវចំណុចល្អរបស់ខ្ញុំ តែនេះជាទម្លាប់ខ្ញុំទៅហើយ ព្រោះការងារមិនមែនធ្វើតែមួយថ្ងៃ ឬមួយដងចប់ទេ អ្នកសិល្បៈគឺត្រូវរង់ចាំការងាររហូត ដូច្នេះហើយទើបខ្ញុំខិតខំធ្វើការងារគ្រប់យ៉ាងឲ្យបានល្អ ដើម្បីខ្លួនខ្ញុំ កូនខ្ញុំ ប្រពន្ធខ្ញុំ និងហោប៉ៅខ្ញុំ ៕
