រដ្ឋមន្ត្រីការពារជាតិរុស្ស៊ី បានបង្ហើបឲ្យដឹងថា នៅថ្ងៃសុក្រ ទី២១ សប្ដាហ៍នេះ ទីក្រុងប៉េកាំង នឹងចូលជាមួយទីក្រុងម៉ូស្គូ ធ្វើសមយុទ្ធជើងទឹកទ្រង់ទ្រាយធំដ៏កក្រើក នៅឆ្នេរសមុទ្របាល់ទិក ដែលស្ថិតនៅភាគខាងជើងនៃទ្វីបអឺរ៉ុប។ សមយុទ្ធទ្វេភាគីនេះ មានឈ្មោះថា Joint Sea 2017 ដោយចាប់ផ្ដើមធ្វើឡើងក្នុងអំឡុងពេលតានតឹងជាមួយសហរដ្ឋអាមេរិក នេះបើយោងតាមការចុះផ្សាយរបស់សារព័ត៌មាន រុស្ស៊ី (RT)។
រដ្ឋមន្ត្រីការពារជាតិលោក សឿចេយ សយហ្គូ (Sergey Shoygu) បានបញ្ជាក់ថា ក្នុងការហ្វឹកហ្វឺនកងនាវានេះ រដ្ឋាភិបាលចិន បានបញ្ជូននាវាពិឃាដសមត្ថភាពមីស៊ីលមួយគ្រឿង បូករួមទាំងនាវាចម្បាំង និងឧទ្ធម្ភាគចក្ររាប់សិបគ្រឿងផ្សេងទៀតរបស់សម្ព័ន្ធមិត្តទាំងពីរ ទៅកាន់សមុទ្របាល់ទិក។
ជុំវិញការធ្វើសមយុទ្ធនេះ រដ្ឋមន្ត្រីការពារជាតិខាងលើ ថ្លែងឲ្យដឹងថា៖ "គោលដៅសំខាន់នៃការធ្វើសមយុទ្ធ គឺបង្កើនប្រសិទ្ធភាព និងសមត្ថភាព ក្នុងកិច្ចសហប្រតិបត្តិការរវាងកងនាវាទាំងពីរប្រទេស ដើម្បីការពារការគំរាមកំហែងសន្តិសុខនៅលើដែនទឹក"។
បើតាមសារព័ត៌មានចិន បានឲ្យដឹងនៅថ្ងៃទី១៨ ខែកក្កដានេះថា ទីក្រុងប៉េកាំង បានដាក់ពង្រាយនាវាចំនួនពីរគ្រឿងរួចហើយ សម្រាប់បញ្ជូនទៅធ្វើសមយុទ្ធនាពេលខាងមុខ ដោយធ្វើឡើងខណៈប្រទេសដែលមានសេដ្ឋកិច្ចខ្លាំងទាំងពីរ កំពុងមានបញ្ហាដ៏ចម្រូងចម្រាសជាមួយសហរដ្ឋអាមេរិក៕
