រាជធានីភ្នំពេញ៖ នាយឧត្តមសេនីយ៍ គៀត ច័ន្ទថារិទ្ធ អគ្គស្នងការរងនគរបាលជាតិ បានអះអាងថា ករណីចាប់ក្មេងវះយកគ្រឿងក្នុងនោះ គ្មានទេនៅកម្ពុជា ដូច្នេះសូមបងប្អូនប្រជាពលរដ្ឋទាំងអស់មានការបារម្ភតទៅទៀត។ ការថ្លែងរបស់អ្នកនាំពាក្យអគ្គស្នងការនគរបាលជាតិរូបនេះបានថ្លែងវេលាថ្ងៃត្រង់ថ្ងៃទី ៣១ ខែកក្កដានេះ ក្នុងសន្និសីទសារព័ត៌មានបកស្រាយ និងបំភ្លឺជុំវិញករណីផ្ទុះព័ត៌មានខាងលើ។
ឯកឧត្តមបន្តថា ករណីចាប់ក្មេងនៅកម្ពុជា ដែលនាំឲ្យមានការភ័យខ្លាច និងភ័ន្តច្រឡំយ៉ាងខ្លាំងពីសំណាក់ប្រជាពលរដ្ឋទូទៅ អាចមានក្រុមចាត់តាំងណាមួយ ធ្វើឡើងដើម្បីបំពុលបរិយាកាសសង្គមក្នុងចេតនាវាយប្រហារលើ កម្លាំងនគរបាលជាតិ និងជាពិសេសកេងចំណេញលើផ្នែកអ្វីមួយ ប៉ុន្តែលោកមិនទាន់ហ៊ានសន្និដ្ឋានថាផ្នែកនោះ គឺជានយោបាយទេ។
ក្នុងនោះដែរ អគ្គស្នងការបានកោះប្រជុំជាមួយស្នងការនគរបាលខេត្តទាំងអស់ជាបន្ត ដើម្បីឲ្យតាមដានករណីចាប់ក្មេងនេះ បន្ទាប់មានព័ត៌មានផ្ទុះឡើងក្នុងរយៈពេលជាង២០កន្លងមក ហើយគិតព្រឹកមិញនេះ អគ្គស្នងការទទួលបានពាក្យបណ្ដឹង១៥ ក្នុងខេត្តចំនួន ១០ពាក់ព័ន្ធករណីខាងលើ។
ក្នុងចំណោមពាក្យបណ្តឹងទាំងនោះ មានករណីចាប់ក្មេងតែមួយគត់នៅខេត្តកំពង់ស្ពឺ ដោយមានអ៊ុំម្នាក់ចាប់ក្មួយទៅខេត្តកំពង់ឆ្នាំងហើយហៅទូរស័ព្ទមកទារប្រាក់ពីម្តាយឪពុកក្មេង៣០០០ដុល្លារ ប៉ុន្តែ ជនល្មើសមិនបានសម្រេចឡើយ គឺត្រូវកម្លាំងសមត្ថកិច្ចបង្ក្រាបបានវិញ។
ដោយឡែកករណីជនសង្ស័យពីរនាក់ ត្រូវសមត្ថកិច្ចខេត្តកំពង់ធំចាប់បានកាលពីថ្ងៃទី២៩ ខែកក្កដាឆ្នាំ២០១៧ ហើយមានអ្នកលេងហ្វេសប៊ុកម្នាក់បានបំផុសព័ត៌មានភ្លាមថា ជាក្រុមចាប់ក្មេងវះយកក្រលៀន រហូតបង្កឲ្យមានការចលាចល ផ្ទុះហិង្សា វាយជនសង្ស័យ២នាក់នោះ គឺមិនមែនជាការពិតទេ ជនសង្ស័យទាំងនោះ ជាមុខសញ្ញាលួចម៉ូតូចាស់ ហើយមានដីកាចាប់ខ្លួន ដូច្នេះទើបពួកគេភ័យនាំគ្នារត់ នៅពេលឃើញសមត្ថកិច្ច។
នាយឧត្ដមសេនីយ៍ បានសង្កត់ធ្ងន់ដែរថា មុនផុស ឬ Share ព័ត៌មានពិសេសលើហ្វេសប៊ុក ឯកឧត្តមសំណូមពរដល់ប្រជាពលរដ្ឋ ត្រូវពិចារណាឲ្យបានគ្រប់ជ្រុងជ្រោយ កុំចេះតែShare នូវរឿងដែលខ្លួនមិនទាន់បានដឹងការពិត ឬមិនទាន់បានគិតពិចារណា ព្រោះវាអាចនឹងនាំឲ្យខ្លួនមានទោសទណ្ឌ ហើយបង្កឲ្យមានចលាចលនិងបំពុលសង្គមបែបនេះ៕
