មានហេតុការណ៍ដ៏គួររន្ធត់មួយ ដែលបណ្ដាលឲ្យមនុស្សស្លាប់ និងរងរបួសយ៉ាងធ្ងន់ធ្ងរ កាលពីម្សិលមិញ នៅពេលដែលពួកគេលេងឧបករណ៍កម្សាន្ត (Fireball) ក្នុងការតាំងពិព័រណ៍ Ohio State Fair នៅរដ្ឋ អូហៃ (Ohio) សហរដ្ឋអាមេរិក។ បើយោងតាមគេហទំព័រសារព័ត៌មាន reuters បានចេញផ្សាយនាព្រឹកនេះ។
ទីភ្នាក់ងារសារព័ត៌មាន WCMH អាមេរិក បានរាយការណ៍ថា ឧបទ្ទវហេតុខាងលើ បណ្ដាលឲ្យមនុស្សម្នាក់ត្រូវបានស្លាប់នៅនឹងកន្លែង និង៥នាក់ផ្សេងទៀតរងរបួសធ្ងន់ធ្ងរ នៅពេលដែលកៅអីឧបករណ៍កម្សាន្តនេះ ជួបបញ្ហាខាងបច្ចេកទេស។ អគ្គស្នងការអង្គភាពពន្លត់អគ្គីភ័យលោក Chief Steve Martin បានប្រាប់ដឹងថា អ្នករងរបួសត្រូវបានបញ្ជូនទៅកាន់មន្ទីរពេទ្យភ្លាមៗ។
អភិបាលអូហៃ លោក John Kasich បាននិយាយនៅក្នុងកម្មវិធី Twitter ថា "ខ្ញុំពិតជាសោកស្ដាយជាខ្លាំង ចំពោះគ្រោះថ្នាក់នេះ ដែលបណ្ដាលឲ្យប្រជាជនរបស់ខ្ញុំត្រូវបាត់បង់អាយុជីវិត និងរងរបួសយ៉ាងធ្ងន់ធ្ងរ"។ ជុំវិញហេតុការណ៍នេះ លោកបន្តទៀតថា គ្រោះថ្នាក់ខាងលើកំពុងត្រូវស៊ើបអង្កេត ប៉ុន្តែមិនទាន់អាចផ្ដល់ព័ត៌មានលម្អិតបាននោះទេ៕
