អប់រំ-ការងារ៖ ពិតជាដូចជាសុភាសិតខ្មែរ ពោលមែនថា ឪពុកខ្លា កូនខ្លាមែន! មិត្តអ្នកអានមួយចំនួនប្រហែលជាធ្លាប់បានស្គាល់ហើយថា លោក កែវ រ៉េមី ជានរណា? លោក កែវ រ៉េមី គឺជាមន្ត្រីជាន់ខ្ពស់លេចធ្លោមួយរូបរបស់រាជរដ្ឋាភិបាលកម្ពុជា ហើយបច្ចុប្បន្នមានមុខតំណាងនិងតួនាទីសំខាន់ជាច្រើន ដោយរាប់ត្រួសៗនោះមានដូចជា អ្នកនាំពាក្យនិងជារដ្ឋលេខាធិការទីស្តីការគណៈរដ្ឋមន្ត្រី ប្រធានគណៈកម្មាធិការសិទ្ធិមនុស្សកម្ពុជា ប្រធានសហព័ន្ធតេក្វាន់ដូ ITF និងជាអនុប្រធានអង្គភាពព័ត៌មាន និងប្រតិកម្មរហ័សជាដើម។
យ៉ាងណាមិញថ្ងៃនេះ អ្នកនិពន្ធសុំមិនរៀបរាប់ច្រើនអំពីលោក កែវ រ៉េមី នោះទេ ប៉ុន្តែសូមទាញចំណាប់អារម្មណ៍មិត្តអ្នកអាន ខេឃ្យូប ងាកមកមើលកូនប្រុសរបស់មន្ត្រីជាន់ខ្ពស់ទីស្ដីការគណៈរដ្ឋមន្ត្រីរូបនេះ។ បើយោងតាមហ្វេសប៊ុក Keo Remy – ITF ដែលបង្ហោះកាលពីពេលថ្មីៗនេះ ឲ្យដឹងថា កូនប្រុសលោក កែវ រ៉េមី ពិតមានសមត្ថភាពខ្ពស់ដោយរៀនបាននិទ្ទេស A ស្ទើរគ្រប់មុខ ហើយប្រឡងចូលសាលាច្បាប់ដ៏ល្បី ចំណាប់ថ្នាក់លេខ ១០ ពិភពលោកបានដោយជោគជ័យ និងបើនិយាយពីថ្លៃសិក្សាវិញ សាលានេះក្នុង១ឆ្នាំ ត្រូវបង់ជិត ៦ម៉ឺនដុល្លារ។
បើកូនរៀនពូកែដូច្នេះ តើលោក កែវ រ៉េមី និយាយដូចម្តេចទៅ?
តាមជាសំណេរដើមរបស់យហ្វេសប៊ុក Keo Remy – ITF បានរៀបរាប់យ៉ាងដូច្នេះថា "កូនល្អ, កូនពូកែមិនដែលរំខានឪពុកម្ដាយទាល់តែសោះ។ គិតៗទៅហាក់ដូចជាមានការស្តាយក្រោយថា មិនបានចំណាយពេលឲ្យបានច្រើនស្និទ្ធស្នាលជាមួយគាត់។ កាលនៅពីតូចខ្ញុំដាក់ឲ្យគាត់រៀននៅសាលាធម្មតាដូចគេដូចឯង តែដល់វគ្គបញ្ចប់ច្បាប់គាត់បានចូលសាលាច្បាប់លេខ ១០ នៅ USA គឺ Northwestern University ហើយទទួលបាន A សឹងតែទាំងអស់។ កុំអោយថាខ្ញុំចេះតែនិយាយ សូមភ្ជាប់ភស្តុតាងមកជាមួយ។ ហាស ហា... ញាក់សាច់ទ្រើតៗ"។
