ខេត្តព្រះសីហនុ៖ ជនសង្ស័យរំលោភសម្លាប់នារីខារ៉ាអូខេ រួចយកសពទៅចោលក្នុងព្រៃ កាលពីដើមខែមីនា ត្រូវនគរបាលព្រះសីហនុតាមប្រមាញ់បានហើយ កាលពាក់កណ្ដាលយប់អាធ្រាត្រឈានចូលថ្ងៃទី ០៦ ខែកក្កដា ឆ្នាំ២០១៧ ម្សិលមិញ ដែលជនល្មើសនោះ ត្រូវបានគេស្គាល់ថា ជាអតីតជាប្តីជនរងគ្រោះ (រំលោភបូកគ្នា៤នាក់)។
លោកវរសេនីយ៍ទោ ញ៉ែត ភ័ណ្ឌ នាយការិយាល័យនគរបាលព្រហ្មទណ្ឌកម្រិតធ្ងន់ខេត្តព្រះសីហនុ បានឲ្យដឹងនៅក្នុងសន្និសីទការសែតបង្ហាញមុខជនល្មើសកាលពីព្រឹកថ្ងៃទី០៧ ខែកក្កដានេះថា អំពើមនុស្សឃាតនេះបានកើតឡើងក្នុងអំឡុងជិតភ្លឺថ្ងៃទី១០ ខែមីនា ឆ្នាំ២០១៧ ប៉ុន្តែដល់ថ្ងៃទី១៣ខែមីនា ទើបប្រជាពលរដ្ឋប្រទះឃើញសាកសពជនរងគ្រោះ នៅក្នុងព្រៃក្បែរស្លាកបារីអាឡាំងដឺឡុង ផ្លូវទៅអូរត្រេះចាស់ ក្នុងភូមិ៦ សង្កាត់លេខ៤ ក្រុងព្រះសីហនុ។
សពជនរងគ្រោះឈ្មោះ ប្រាក់ សុធី (ស្តើង) ភេទស្រី អាយុ ២៤ឆ្នាំ រស់នៅភូមិអូរចំណារ ឃុំ អូរឧកញ៉ាហេង ស្រុកព្រៃនប់ ហើយបានមកធ្វើការនៅហាងខារ៉ាអូខេមួយនៅក្រោយ មន្ទីរពេទ្យបង្អែក សង្កាត់លេខ៤ ក្រុងព្រះសីហនុ។
នាយការិយាល័យព្រហ្មទណ្ឌបានបន្តថា បន្ទាប់ពីមានករណីនេះ ស្នងការនគរបាលខេត្តដាក់ការសង្ស័យជាងគេទៅលើបុរសម្នាក់ ឈ្មោះ ទៀន ខ្លុញ ដែលអតីតជាប្តីរបស់ជនរងគ្រោះ ពីព្រោះជនរងគ្រោះធ្លាប់បានត្អូញត្អែរប្រាប់ពលរដ្ឋនៅជុំវិញខ្លួនថា ជនល្មើសបានគំរាមសម្លាប់នាង។
ក្រោយពីកំណត់មុខសញ្ញាបាន កម្លាំងសមត្ថកិច្ចបានស្នើសុំដីកាកោះហៅឲ្យចូលខ្លួន ប៉ុន្តែ ជនសង្ស័យបានព្យាយាមគេចខ្លួនមួយរយៈពេល លុះដល់ម៉ោង ១២:៣០នាទី រំលងអធ្រាត្រ ឈានចូលថ្ងៃទី ៦ ខែកក្កដាម្សិលមិញ កម្លាំងជំនាញបានឃើញឈ្មោះ ទៀន ខ្លុញ ក្នុងរង្គសាលឌីស្កូថេក អិលវី រួចក៏បានឃាត់ខ្លួនមកសាកសួរ និងឈានទៅចាប់បក្សពួកជាបន្តបន្ទាប់
ជនសង្ស័យដែលសមត្ថកិច្ចខេត្តព្រះសីហនុឃាត់ខ្លួនបាននោះ មានចំនួន ៤នាក់ រួមមាន៖
១ ឈ្មោះទៀន ខ្លុញ ឬ ទៀន ប៊ុនឡូ ភេទប្រុស អាយុ ៣០ ឆ្នាំ ស្នាក់នៅក្រុមទី ២០ ភូមិ២ សង្កាត់លេខ ១ ក្រុងព្រះសីហនុ មុខរបរ កម្មករសំណង់ អតីតកាលត្រូវជាប្តីអត់ខ័នស្លា របស់ជនរងគ្រោះ។
២ ឈ្មោះ សៅ បូរ៉ា ភេទ ប្រុស អាយុ ៣២ ឆ្នាំ មានទីលំនៅឋាន នៅភូមិ៤ សង្កាត់លេខ១ក្រុងព្រះសីហនុ មុខកម្មករសំណង់។
៣ ឈ្មោះ ផុន សុភ័ណ្ឌ ភេទប្រុសអាយុ ៣០ ឆ្នាំ មានលំនៅឋាន នៅភូមិ ៣ សង្កាត់លេខ ២ ក្រុងព្រះសីហនុ មុខរបរកម្មករសំណង់។
៤ ឈ្មោះស៊ុន ណារិទ្ធិ ភេទប្រុសអាយុ៣០ឆ្នាំ មានទីលំនៅឋាននៅភូមិ១ សង្កាត់លេខ១ក្រុងព្រះសីហនុ កម្មករសំណង់។
លោកវរសេនីយ៍ទោខាងលើ បានអះអាងឱ្យដឹងថា ជនសង្ស័យទាំង៤បានសារភាពនៅចំពោះ មុខសមត្ថកិច្ចថា ពួកគេពិតជាបានរំលោភសម្លាប់ជនរងគ្រោះមែន នៅវេលាម៉ោងជាង ៣ជិតភ្លឺឈាន ចូលថ្ងៃទី១០ខែមីនា បន្ទាប់ពីបក្សពួកខ្លួនបាននាំជនរងគ្រោះចេញពីខារ៉ាអូខេ ឈ្មោះស្រីខួច រួចធ្វើសកម្មភាពយ៉ាងព្រៃផ្សៃរំលោភបូក ម្នាក់ម្តងៗរហូតដល់នាងស្រែកយំខ្លាំងៗហៅឲ្យគេជួយ។
ឃើញសភាពស្រែកខ្លាំងៗបែបនេះ បក្សពួកជនល្មើសបានយកកន្សែងពោះគោរឹតក និង យកកាំបិតចាក់បន្ថែម រហូតដល់ជនរងគ្រោះស្លាប់ ហើយក៏បានដឹកយកសពដឹកទៅផ្លុងចោលនៅក្នុងព្រៃ ជិតស្លាកបារីអាឡាំងឌឺឡូង៕
