កីឡាករខ្ចីជើងចំណូលថ្មីតែក្នុងលក្ខខណ្ឌខ្ចីជើង James Rodriguez បានលើកឡើងថា លោកមិនបោះបង់ក្ដីសុបិននៅ Real Madrid នោះទេ ទោះបីជាពេលត្រូវផ្ទេរមកលេងនៅក្របខ័ណ្ឌ Bundesliga។
James បានបញ្ជាក់ថាទ្វារនៅតែបើកសម្រាប់អាជីពនៅ Real Madrid ទោះបីជាលោក បានចូលលេងនៅBayern Munich ។ កីឡាករជម្រើសជាតិកូឡុំប៊ីបានយល់ព្រមកុងត្រា២ឆ្នាំ ជាមួយក្លឹបជើងឯកអាល្លឺម៉ង់ ដែលជាកន្លែងរូបគេរំពឹងថា បានចូលលេងជាប់លាប់ឡើងវិញ ដើម្បីត្រឡប់ទៅយកកៅអីជម្រើសដំបូង១១នាក់នៅ Real Madrid វិញ។
“ ពួកយើងមានកីឡាករអស្ចារ្យជាច្រើន ហើយខ្ញុំត្រូវតែប្រយុទ្ធយកកៅអីជម្រើសដំបូង១១នាក់របស់ខ្ញុំវិញ។ ខ្ញុំអាចលេងក្នុងដំណែងស្លាបស្ដាំឆ្វេង និងជាខ្សែបម្រើនាំលេងហើយខ្ញុំនឹងលេងគ្រប់ទីតាំងដែលគ្រូបង្វឹកដាក់ឲ្យលេង"។
“ ទ្វារនៅតែបើកសម្រាប់ខ្ញុំទៅ Real Madrid វិញប៉ុន្តែពេលនេះខ្ញុំគ្រាន់តែគិតថានៅទីនេះក្នុងរយៈពេល២ឆ្នាំហើយបន្ទាប់មកខ្ញុំនឹងធ្វើការសម្រេចចិត្ត" James និយាយបន្ត។
កីឡាករវ័យ២៦ឆ្នាំធ្លាប់លេងក្រោមការដឹកនាំរបស់លោក Carlo Ancelotti រួចម្ដងមកហើយកាលនៅអេស្ប៉ាញដោយបានបង្ហាញទម្រង់លេងពេញចិត្តគ្រូបង្វឹកសញ្ជាតិអ៊ីតាលីហើយមកដល់ពេលនេះលោកនៅតែទុកចិត្តអតីតកីឡាកររបស់ខ្លួនហើយនាំមកលេងនៅអាល្លឺម៉ង់ទាល់តែបាន៕
