គ្រូបង្វឹកក្រុមបិសាចក្រហម Manchester United លោក Jose Mourinho បានជួប Gareth Bale នៅលើផ្លូវចេញពីបន្ទប់ផ្លាស់សំលៀកបំពាក់ក្នុងការជួបគ្នាកាលពី២ថ្ងៃមុនក្នុងលក្ខណៈមិត្តភាពនៅ Levi's Stadium ក្នុងទីក្រុង Santa Clara រដ្ឋកាលីហ្វ័រញ៉ា។
Bale មានវ័យ២៨ឆ្នាំហើយមានទំនាក់ទំនងផ្ទេរទៅលេងនៅOld Trafford ហើយទូរទស្សន៍អេស្ប៉ាញ បានចាប់រូបភាពត្រង់Jose និងBale ជួបគ្នាមុនការប្រកួតមកដល់។ ក្នុងរយៈពេលនោះគេចាប់បានសម្ដីរបស់លោក Jose Mourinho និយាយទៅកាន់Bale ថា៖" ខ្ញុំមិនអាចទិញអ្នកបានទេព្រោះមិននិយាយមកកាន់ខ្ញុំ"។
លើសពីពាក្យសម្ដីនេះវាអាចធ្វើឲ្យប្រិយមិត្តMan Utd ខកចិត្តផងដែរដោយគ្រូបង្វឹកសញ្ជាតិព័រទុយហ្គាល់បានបដិសេធធ្វើការផ្ទេរយកBale ខណៈលោកថាពេលនេះBale កំពុងរីករាយនឹងជីវិតនៅកីឡដ្ឋានBernabeu ។
ពេលអ្នកកាសែតសួរថាតើBale ជាគោលដៅចម្បងរបស់Man Utd ? អតីតគ្រូបង្វឹកChelsea បាននិយាយតបថា៖" ទេ! អ្នកបានដឹងហើយថាវាមិនអាចទៅរួចទេ។ខ្ញុំគិតយ៉ាងច្បាស់ថា Bale ចូលចិត្ត Real Madrid ចូលចិត្តការប្រកួតប្រជែងចូលចិត្តស្ថានភាពនៅទីនោះ។ គាត់កំពុងស្ថិតក្លឹបដែលមានស្ថានភាពល្អប្រសើរ។ខ្ញុំមិនដែលមានអារម្មណ៍ចង់ឲ្យគាត់ចាកចេញពីនោះទេ ហេតុអ្វីយើងចាំបាច់ត្រូវនឿយហត់ដោយសាររឿងនេះ? គឺអត់ទេ"៕
ប្រភព៖ Metro
