ទីភ្នាក់ងារការពារមីស៊ីល របស់សហរដ្ឋអាមេរិក (MDA) បានបង្ហាញពីរូបភាព និងខ្សែវីដេអូ ដ៏គួរឲ្យកត់សំគាល់មួយ ដែលខ្លួនបានធ្វើសាកល្បងប្រព័ន្ធការពារ THAAD បាញ់ទម្លាក់មីស៊ីលផ្លោងរយៈចម្ងាយមធ្យម (IRBM) កាលថ្ងៃអង្គារ ដើម្បីឆ្លើយតបទីក្រុងព្យុងយ៉ាង ខណៈភាគីទាំងពីរកំពុងស្ថិតក្នុងសភាពតានតឹងខ្ពស់ទម្រង់។
ទីភ្នាក់ងារខាងលើបានឲ្យដឹងថា "ការធ្វើតេស្តនេះ គឺដោយប្រើយន្តហោះប្រយុទ្ធ C-17 របស់សហរដ្ឋអាមេរិកមួយគ្រឿងបាញ់មីស៊ីលឆ្លងកាត់មហាសមុទ្រប៉ាស៊ីហ្វិក ភាគខាងជើងកោះហាវ៉ៃ ភ្លាមៗនោះត្រូវបានប្រព័ន្ធ THAAD បាញ់កម្ទេច ទម្លាក់ចោលយ៉ាងមានប្រសិទ្ធភាព ដែលបញ្ជាក់ថារាល់មីស៊ីល របស់កូរ៉េខាងជើង គឺមិនអាចគេចផុតពីរ៉ាដារបស់ប្រព័ន្ធខែលការពារដែនអាកាសនេះឡើយ"។
យោងតាមសេចក្ដីថ្លែងការណ៍របស់ MDA សហរដ្ឋអាមេរិកបច្ចុប្បន្នបានត្រៀមខ្លួនរួចជាស្រេចហើយដើម្បីឆ្លើយតបការគំរាមកំហែងរបស់មេដឹកនាំលោក គីម ជុងអ៊ុន ក៏ដូចជាទទួលស្វាគមន៍សង្គ្រាមនុយក្លេអ៊ែរជាមួយកូរ៉េខាងជើង ខណៈដែលប្រធានាធិបតី កូរ៉េខាងត្បូង លោក Moon Jae-in អះអាងថា ប្រព័ន្ធ THAAD បានបន្តដាក់ពង្រាយតាំងពីថ្ងៃទី០៧ ខែកក្ដា សប្ដាហ៍មុន៕