បន្ទាប់ពី Arsenal បានប្រកួតចាញ់ Liverpool យ៉ាងចាស់ដៃក្នុងលទ្ធផល៤ទល់០មក អនាគតរបស់ Alexis Sanchez កំពុងស្ថិតក្នុងមន្ទិលដ៏ធំមួយ។ ក្រោយពេលកាំភ្លើងធំបដិសេធលក់កីឡាករឈីលីរូបនេះឲ្យ Man City ក្លឹបបិសាចក្រហមក៏មានព័ត៌មានរអេចរអូចថា ចង់បានខ្សែប្រយុទ្ធស្លាបរូបនេះ ពីព្រោះពួកគេត្រូវការកីឡាករលេងក្នុងដំណែងប្រយុទ្ធស្លាប។
បែបណាក្ដី! អតីតកីឡាករ Barcelona គួរតែពិចារណាមកលេងនៅ Old Trafford ហើយក្លឹបទាំងគ្រូបង្វឹករបស់ Man Utd ក៏ពិចារណាទិញយក ដោយសារចំណុចខ្លាំងរបស់គេ សាកសមជាមួយបិសាចក្រហម។តើចំណុចណាខ្លះទៅដែល Man Utd គួរតែទិញ Alexis Sanchez?
Alexis Sanchez សាកសមជាមួយ Premier League
Manchester United ត្រូវការខ្សែប្រយុទ្ធស្លាប ហើយក្នុងអំឡុងរដូវកាលនេះ ពួកគេជាប់ទាក់ទងជាមួយនឹង Ivan Perisic ពីក្លឹប Inter Milan ដែលកីឡាកររូបនេះ ទាត់បញ្ចូលទី១១គ្រាប់ក្នុង៣៦ប្រកួតនៃលីក។ ម្យ៉ាងវិញទៀត Sanchez ទាត់បញ្ចូលទី២៤គ្រាប់ក្នុងលីក៣៨ប្រកួត និងមានការបញ្ជូនបាល់ជាច្រើនដងទៀត។ នេះភាពខុសគ្នារវាងកីឡាករទាំងពីរ។ Perisic លេងនៅ Serie A ដែលជាលីកងាយស្រួលជាងPremier League ហើយរូបគេប្រហែលជាមិនអាចបង្ហាញទម្រង់លេងបានល្អដូចនៅ Serie Aទេ ចុះ Alexis Sanchez ដែលល្អស្រាប់នៅ Premier League?
Alexis Sanchez ជាកីឡាករអាចប្រើប្រាស់ជើងទាំងពីរ
កីឡាករឈីលីរូបនេះ ត្រូវបានគេដឹងថាជាកីឡាករខ្លាំងក្នុងការប្រើជើងស្ដាំ តែពិនិត្យឲ្យមែនទែនទៅ ជើងខាងណាក៏ប្រើបានហើយខ្លាំងទៀត។ Sanchez អាចលេងក្នុងចំណែងមួយចំនួនយ៉ាងល្អឥតខ្ចោះ។ ប្រយុទ្ធស្លាបស្ដាំក៏បាន ឆ្វេងក៏បាន ប្រយុទ្ធចំតួក៏បាន។ ចុះបើបានហើយ Man Utd ម៉េចក៏មិនយកមក? ជើងឆ្វេងរបស់Sanchez ពេលខ្លះល្អជាងជើងស្ដាំពីកំណើតរបស់គាត់ផង។
Manchester United ត្រូវកីឡាករលំដាប់ World Class
បើបិសាចក្រហមចង់ឈ្នះ Premier League, ពួកគេត្រូវបានកីឡាករបម្រុងដ៏ខ្លាំងមួយ។ Lingard គឺជាកីឡាករល្អមួយ ប៉ុន្តែកម្រិតរបស់ Sanchez មិនថាបម្រុង ឬជម្រើសដំបូងទេ គាត់តែងតែផ្លាស់ប្ដូរស្ថានភាពប្រកួតឲ្យកាន់តែប្រសើរឡើង។ Man Utd មាន Martial,Lingard និង Rashford លេងក្នុងដំណែងប្រយុទ្ធស្លាបឆ្វេង។ ប៉ុន្តែពួកគេមិនអាចកែប្រែការប្រកួតធំៗមួយចំនួនដូចជា Champions League បានឡើយ។
Manchester City មានកីឡាករច្រើននាក់លេងក្នុងដំណែងរបស់ Sanchez
Manchester City មានកីឡាករច្រើននាក់លេងក្នុងដំណែងដែល Sanchez អាចលេងបានដូចជា៖ Kevin De Bruyne,David Silva,Bernardo Silva,Gabriel Jesus,Sergio Aguero,Raheem Sterling, និង Leroy Sane។ បើ Sanchez ល្អដែរ ហេតុអ្វីចាំបាច់ទៅអង្គុយបម្រុងនៅ Man City ហើយហេតុផលមួយទៀតតើគាត់ពិតជាសាកសមលេងនៅ Man City មែនអត់?
Manchester United ត្រូវការកីឡាករមានគោលគំនិតចង់ឈ្នះ
ដូចដែលអ្នកគាំទ្របាល់ទាត់ទាំងអស់បានដឹង! Alexis Sanchez គឺជាកីឡាករដែលចង់ឈ្នះអ្វីៗទាំងអស់លើពិភពលោក ជាមួយនឹងបុគ្គលិកលក្ខណៈចង់ឈ្នះ (Winning Mentality) ដែលគាត់នឹងលេងលើសពី១០០%គ្រប់ពេលវេលាក្នុងទីលាន។ Manchester United ខ្វះកីឡាករបែបនេះ បន្ទាប់ពី កីឡាករយុគមាសរបស់ Man Utd បានចាកចេញឬចូលនិវត្តន៍ទៅ។
Zlatan ប្រហែលជាកីឡាករតែម្នាក់គត់ ដែលមានគោលគំនិត និងបុគ្គលិកលក្ខណៈ មហិច្ឆតាដូចSanchez ប៉ុន្តែបើមាន Zlatan ហើយ Sanchez លេងក្នុងក្រុមជាមួយគ្នា សាកស្រមៃទៅមើល នឹងមានរឿងអ្វីកើតឡើង?
ចុះប្រិយមិត្តវិញគិតយ៉ាងណាដែរ?តើគាត់ពិតជាសាកសមសម្រាប់ Man Utd ដែរអត់?
