រាជធានីភ្នំពេញ៖ ហេតុការណ៍គួរឲ្យភ្ញាក់ផ្អើលមួយបានកើតឡើង កាលពីវេលាម៉ោងជិត៩យប់ ថ្ងៃទី១៦ ខែសីហាម្សិលមិញ នៅតាមបណ្ដាលផ្លូវ៥៩៨ មុខដីឧកញ៉ា លី ហួរ ក្នុងសង្កាត់ទួលសង្កែ ខណ្ឌឫស្សីកែវ បុរសម្នាក់បានដកកាំភ្លើងរបស់ខ្លួនបាញ់ជិត១០គ្រាប់ ទៅលើរថយន្តមួយគ្រឿងទៀតដែលបើកមកគៀរថយន្តរបស់ខ្លួនបណ្ដាលឲ្យខូចខាតមួយចំហៀងខាងមុន។
តាមប្រភពនៅនឹងកន្លែងកើតហេតុប្រាប់ឲ្យដឹងថា មុនពេលកើតហេតុ មានរថយន្តក្រុងមួយគ្រឿងធ្វើដំណើរពីត្បូងទៅជើង ពេលមកដល់កន្លែងកើតហេតុបានគៀរថយន្តព្រូសមួយគ្រឿង ប៉ុន្តែរថយន្តក្រុងមិនបានឈប់ដោះស្រាយនោះទេ គឺនៅតែបន្ដដំណើរទៅមុខ ទើបធ្វើឲ្យម្ចាស់រថយន្ដព្រូសខឹង ទាញកាំភ្លើងបាញ់ប្រហារពីក្រោយតែម្ដង។
យ៉ាងណាមិញនៅក្នុងករណីនេះ មិនមានមនុស្សណាម្នាក់រងរបួសនោះទេ ហើយក្រោយពេលកើតហេតុកម្លាំងជំនាញបានចុះមកវាស់វែង និងប្រមូលភស្តុតាងទៅរក្សាទុកនៅស្នងការដ្ឋាននគរបាលរាជធានីភ្នំពេញ៕
