អតីតនាយករដ្ឋមន្ត្រីថៃ លោកស្រី Yingluck Shinawatra បានធ្វើសេចក្ដីថ្លែងការណ៍ចុងក្រោយ ទៅកាន់តុលាការទីក្រុងបាងកក នៅថ្ងៃអង្គារនេះ ថា រូបខ្ញុំមិនបានប្រព្រឹត្តកំហុសឆ្គងណាមួយ ដែលពាក់ព័ន្ធនឹងការចោទប្រកាន់ក្នុងរឿងខាតបង់ថវិកាជាតិរាប់ពាន់លានបាត ដោយសារតែប្រមូលទិញស្រូវក្នុងតម្លៃថ្លៃ ពីប្រជាកសិករនោះទេ។ នេះបើយោងតាមគេហទំព័រសារព័ត៌មាន Bangkokpost បានចេញផ្សាយ។
លោកស្រី Yingluck ត្រូវបានតុលាការរកឃើញថា ជាប់ពាក់ព័ន្ធក្នុងរឿងធ្វើឲ្យខាតបង់ថវិកាជាតិប្រមាណ ៥៣០ពាន់លានបាត និងអាចប្រឈមមុខជាប់ពន្ធនាគារចំនួន ១០ឆ្នាំ ខណៈតុលាការនឹងប្រកាសសាលក្រម នៅថ្ងៃទី២៥ ខែសីហា ខាងមុខនេះ។ លោកស្រី បានបន្ថែមទៀតថា "គោលនយោបាយទិញស្រូវពីកសិករថៃក្នុងតម្លៃថ្លៃ បានជំរុញកំណើនសេដ្ឋកិច្ចនៅកម្រិតមូលដ្ឋាន និងថ្នាក់ជាតិ ហើយវាមិនបានធ្វើឲ្យខាតបង់ដល់សេដ្ឋកិច្ចជាតិនោះទេ វាជាហេតុផលតែមួយគត់ ដែលខ្ញុំចង់ឲ្យគោលនយោបាយនេះ នៅតែបន្តដំណើរការ ព្រោះវាគឺជាគោលនយោបាយស្អាតស្អំ និងត្រឹមត្រូវ"។
គួររម្លឹកផងដែរថា លោកស្រី Yingluck ត្រូវបានរដ្ឋាភិបាលថៃបច្ចុប្បន្នលោក Prayut Chan-o-cha បានធ្វើរដ្ឋប្រហារទម្លាក់ពីតំណែង កាលពីខែឧសភា ឆ្នាំ២០១៤ និងត្រូវហាមមិនឲ្យចូលរួមធ្វើសកម្មភាពនយោបាយរយៈពេល ០៥ឆ្នាំ៕
