លោក ដួង វីរៈសិទ្ធ គឺជាតារាចម្រៀងចូលចិត្តស្លៀកពាក់ស៊ីវិល័យ និងច្នៃម៉ូដប្លែកៗ ប៉ុន្តែចំណង់ចំណូលចិត្តលោកមិនបោះបង់អត្តសញ្ញាណជាកូនខ្មែរឡើយ។ ចង់ដឹងទេ ការច្នៃម៉ូដសំលៀកបំពាក់របស់តារាចម្រៀងវ័យក្មេងល្បីឈ្មោះ មួយឈុតមានតម្លៃខ្ពស់កម្រិតណា ?
ផ្ដល់បទសម្ភាសន៍ជាមួយលោក តាន់ ចន្ថា អ្នកយកព័ត៌មាន Kqube នៅក្នុងស្ទូឌីយោស្ថានីយទូរទស្សន៍បាយ័នលោក ដួង វីរៈសិទ្ធ បានប្រាប់ថា ជាទូទៅសំលៀកបំពាក់របស់លោកភាគច្រើន គឺជាការច្នៃម៉ូដរបស់ជាងប្រចាំខ្លួនលោកផ្ទាល់ ហើយក្នុងមួយឆ្នាំៗលោកបានកុម្ម៉ង់ច្នៃប្រមាណជា៣០ទៅ៤០ ម៉ូដ និងមានតម្លៃខ្ពស់ ក្នុងមួយឈុតគឺចាប់ពី២០០ទៅ៣០០ ដុល្លារ ។ ចំណែកឈុតតម្លៃទាបបំផុត គឺត្រឹម៥០ដុល្លារ ហើយមូលហេតុដែលសេវាច្នៃម៉ូដរាងថ្លៃ គឺឈុតខ្លះលោកជ្រើសរើសសាច់ក្រណាត់ល្អ និងពិបាកច្នៃខ្លាំង ដូច្នេះហើយត្រូវប្រើពេលរាងយូរ ទើបជាងគេទារតម្លៃរាងខ្ពស់។
តារារូបនេះបន្តថា ក្រៅពីសំលៀកបំពាក់ច្នៃម៉ូដផ្ទាល់ លោកក៏មានទិញពីក្រៅស្រុកយកមកច្នៃបន្ថែមផងដែរ ហើយសំលៀកបំពាក់ទាំងនោះមានមកពីប្រទេស ថៃ ហុងកុង កូរ៉េ ជាដើម រីឯតម្លៃគឺដូចលើទីផ្សារ ។ តារារូបនេះបន្តថា ក្នុងមួយឆ្នាំៗលោកបានចំណាយថវិកាទៅលើសំលៀកបំពាក់ និងការតុបតែងខ្លួនស្ទើរជិតពាក់កណ្ដាលនៃចំណូលសរុបទៅហើយ ៕
